កាលពីពេលថ្មីៗនេះ ក្រុមហ៊ុនស្រាវជ្រាវ IDC បានបញ្ចេញរបាយការណ៍មួយ ស្ដីពីការលក់ទូរស័ព្ទទូទាំងសកលលោក ដោយក្នុងនោះក្រុមហ៊ុន Samsung នៅរក្សាម្កុដ ជាស្ដេចត្រាញ់ក្នុងវិស័យមួយនេះ ពោលគឺលក់ទូរស័ព្ទបានច្រើនបំផុតលើលោកកាលពីត្រីមាសទី២។ នេះបើតាមការចុះផ្សាយពីសារព័ត៌មាន Businesskorea។
គិតត្រឹមដំណាច់ត្រីមាសទី២ ក្រុមហ៊ុន Samsung បាននាំចេញទូរស័ព្ទប្រហែល ៥៤លានគ្រឿង ក្ដោបក្ដាប់ចំណែកទីផ្សារអន្តរជាតិបាន ១៨,៩% ខណៈគូប្រជែងធំ គឺក្រុមហ៊ុន Apple អាចលក់បានត្រឹម ៤៥,២លានគ្រឿង ឬស្មើនឹង ១៥,៨% នៃចំណែកទីផ្សារសរុប។
ចំណែកឯក្រុមហ៊ុនដែលលក់ទូរស័ព្ទបានច្រើនបំផុតបន្ទាប់ គឺជាក្រុមហ៊ុនចិន ដែលមានដូចជា Xiaomi លក់បាន ១៤,៨% ក្រុមហ៊ុន Vivo លក់បាន ៩,១% និងក្រុមហ៊ុន Oppo លក់បាន ៩%។
សូមជម្រាបដែរថា អត្រាលក់ទូរស័ព្ទទូទាំងសកលលោកមានកំណើន ៤ត្រីមាសជាប់ៗគ្នា ខណៈកាលពីត្រីមាសមុន វាបានកើនដល់ ៦,៥% ពោលការលក់ទូរស័ព្ទទូទាំងសកលលោក មានចំនួនដល់ ២៨៥,៤លានគ្រឿងឯណោះ៕
