កាលពីពេលថ្មីៗនេះ ក្រុមហ៊ុន Huawei Technologies ទើបនឹងបញ្ចប់ការសាងសង់មជ្ឈមណ្ឌលស្រាវជ្រាវ និងអភិវឌ្ឍន៍នៅក្នុងទីក្រុងសៀងហៃ ដែលមានតម្លៃ ១០ពាន់លានយ៉ន់ ឬប្រហែល ១,៤ពាន់លានដុល្លារ។ នេះបើតាមការចុះផ្សាយពីសារព័ត៌មាន SCMP។
មជ្ឈមណ្ឌលខ្នាតយក្សមួយនេះគឺមានទីតាំងនៅក្នុងតំបន់ Jinze នៃស្រុក Qingpu ហើយវាត្រូវបានក្រុមហ៊ុន Huawei ដាក់ឈ្មោះថា Lianqiu Lake R&D Centre។
វាត្រូវបានសាងសង់លើផ្ទៃដីប្រហែល ១៦០ហិកតា ដោយបានបែងចែកជា ៨ប្លុក និងមានអគាររហូតដល់ ១០៤អគារ រួមបញ្ចូលទាំងមន្ទីរពិសោធន៍ អគារការិយាល័យ និងកន្លែងកម្សាន្តផ្សេងៗ ហើយក៏មានខ្សែរថភ្លើងក្រោមដី ងាយស្រួលក្នុងការធ្វើដំណើរផងដែរ។
សូមជម្រាបដែរថា ស្ថាបនិកក្រុមហ៊ុន Huawei មហាសេដ្ឋី Ren Zhengfei បានបង្ហើបប្រាប់ថា មជ្ឈមណ្ឌលថ្មីនេះនឹងដើរតួយ៉ាងសំខាន់លើការស្រាវជ្រាវ និងអភិវឌ្ឍន៍ ដែលមានលក្ខណៈទ្រង់ទ្រាយធំ ហើយលោកសង្ឃឹមថា វានឹងអាចអូសទាញយុវជនមានសមត្ថភាពពីក្រៅប្រទេស ដោយសារនៅទីនោះមានហាងកាហ្វេច្រើនជាង ១០០ទីតាំង ដ្បិតបច្ចុប្បន្នយុវជនចូលចិត្តចំណាយពេលធ្វើការនៅហាងកាហ្វេ ជាជាងបន្ទប់ការិយាល័យ៕
