ក្រុមហ៊ុនមហាសេដ្ឋីវៀតណាម បើកការដ្ឋានសាងសង់រោងចក្រថ្មី នៅឥណ្ឌូណេស៊ី

ក្រុមហ៊ុនផលិតរថយន្តអគ្គិសនី VinFast Auto មហាសេដ្ឋីវៀតណាម Pham Nhat Voung កាលពីថ្ងៃទី១៥ ខែកក្កដាកន្លងទៅ​ បានចាប់ផ្តើមបើកការដ្ឋានសាងសង់រោងចក្រដំឡើងរថយន្ត EV ថ្មីរបស់ខ្លួន នៅក្នុងទីក្រុង Subang ខេត្ត West Java ប្រទេសឥណ្ឌូណេស៊ី។

តាមការចុះផ្សាយពីសារព័ត៌មាន VN Express បានបង្ហាញឲ្យដឹងថា ជាមួយនឹងការវិនិយោគដំបូងប្រហែល ២០០លានដុល្លារ រោងចក្រថ្មីនេះ ត្រូវវបានគេរំពឹងទុកថានឹងមានសមត្ថភាពអាចផលិតរថយន្ត EV បានចំនួន ៥ម៉ឺនគ្រឿង ក្នុងមួយឆ្នាំ។

តាមផែនការរោងចក្រថ្មីនេះ គ្រោងនឹងចាប់ផ្តើមប្រតិបត្តិការដំបូងរបស់ខ្លួន នៅត្រីមាសទី៤ ឆ្នាំ២០២៥ ខាងមុខ ដោយនឹងផ្តោតលើការផលិតរថយន្តចង្កូតស្តាំនៃប្រភេទ e-SUV របស់ VinFast រួមទាំងម៉ូដែល VF 3, VF 5, VF 6 និង VF 7 សម្រាប់ទីផ្សារឥណ្ឌូណេស៊ី ផ្ទាល់តែម្តង។

ជាមួយគ្នានេះ លោក Temmy Wiradjaja នាយកប្រតិបត្តិក្រុមហ៊ុន VinFast ប្រចាំប្រទេសឥណ្ឌូណេស៊ី បានកត់សម្គាល់ថា ពិធីបើកការដ្ឋានសាងសង់រោងចក្រថ្មីនេះ បានកើតឡើងត្រឹមតែប៉ុន្មានខែប៉ុណ្ណោះ បន្ទាប់ពីការបង្ហាញវត្តមានជាផ្លូវការរបស់ VinFast នៅក្នុងប្រទេសឥណ្ឌូណេស៊ី។ ក្រុមហ៊ុនក៏បានបង្ហាញពីយុទ្ធសាស្ត្រពង្រីក និងកែលម្អការប្រកួតប្រជែងរបស់ខ្លួននៅក្នុងទីផ្សារឥណ្ឌូណេស៊ី ដើម្បីក្លាយជាក្រុមហ៊ុនឈានមុខគេ ក្នុងទីផ្សាររថយន្ត EV និងមានសក្តានុពលបំផុតមួយ ក្នុងតំបន់៕