អំឡុងពេលក្រុមហ៊ុនលក់សម្ភារៈប្រណីតៗដូចជា LVMH និង Kering នៅប្រទេសបារាំង កំពុងត្អូញត្អែរពីអត្រាលក់មានចំណូលទាប ក្រុមហ៊ុន Hermes បែរជាកំពុងសប្បាយកើបលុយពីអតិថិជនទៅវិញ។
យោងតាមការចុះផ្សាយពីសារព័ត៌មាន Reuters បានបង្ហាញថា ក្រុមហ៊ុនបារាំង Hermes បានបង្ហាញអត្រាលក់ប្រចាំត្រីមាសទី២ កើនឡើងដល់ ១៣% ស្របពេលក្រុមហ៊ុនគូប្រជែងដទៃ កំពុងជួបប្រទះការខាតបង់។
នៅក្នុងត្រីមាសទី២ ក្រុមហ៊ុន Hermes លក់ផលិតផលបានរហូតដល់ ៤ពាន់លានដុល្លារ ឬប្រហែល ១៣% ខណៈសរុបប្រាក់ចំណេញរយៈពេលកន្លះឆ្នាំដំបូងវិញ ក្រុមហ៊ុនយក្សមួយនេះកើបលុយចូលហោប៉ៅបានប្រហែល ៣,៥ពាន់លានដុល្លារហើយ។
សូមជម្រាបដែរថា ផលិតផលដែលជួយដល់កំណើនលក់របស់ក្រុមហ៊ុន Hermes គឺកាបូបយួរដៃ Birkin ដែលផលិតដោយដៃសុទ្ធសាធ និងចំណាយពេលយូរក្នុងការផលិត ដែលធ្វើឲ្យអតិថិជនហ៊ានចាយលុយខ្ទង់ម៉ឺនដុល្លារ ដើម្បីទិញកាបូបយួរដៃមួយ ស្របពេលមួយរយៈចុងក្រោយក្រុមហ៊ុនអះអាងថា អតិថិជននៅចិនកំពុងសម្រុកបញ្ជាទិញកាបូប Birkin ជាច្រើនថែមទៀត៕
