ក្រុមហ៊ុនខ្នាតយក្សអាមេរិក Uber បានចុះកិច្ចព្រមព្រៀងជាមួយក្រុមហ៊ុនខ្នាតយក្សចិន BYD ដើម្បីពង្រីកប្រតិបត្តិការរបស់ខ្លួនទូទាំងសកលលោក បើទោះជារដ្ឋាភិបាលអាមេរិក និងលោកខាងលិច កំពុងទាមទារពន្ធខ្លាំងលើរថយន្តអគ្គិសនីចិនក៏ដោយ។
យោងតាមការចុះផ្សាយពីសារព័ត៌មាន SCMP បានបង្ហាញថា ក្រុមហ៊ុនចិន BYD នឹងផ្គត់ផ្គង់រថយន្តអគ្គិសនី ដល់ក្រុមហ៊ុន Uber ប្រហែល ១០០ ០០០គ្រឿង ដើម្បីឲ្យក្រុមហ៊ុនអាមេរិកអាចពង្រីកប្រតិបត្តិការរបស់ខ្លួនទូទាំងសកលលោក។
គួររំលឹកបន្តិចថា វានឹងក្លាយជាកិច្ចកុងត្រាធំបំផុតរបស់ក្រុមហ៊ុន BYD បន្ទាប់ពីក្រុមហ៊ុន Uber សន្យាទិញរថយន្ត ១០០ ០០០គ្រឿង ខណៈគិតជាមធ្យមកុងត្រានេះមានតម្លៃដល់ទៅជាង ១៣ពាន់លានដុល្លារ ដ្បិតរថយន្ត BYD មានតម្លៃមធ្យមប្រហែល ១៣ ០០០ដុល្លារក្នុងគ្រឿង។
សូមជម្រាបដែរថា ក្រុមហ៊ុន Uber គឺជាអ្នកផ្ដល់សេវាកម្មដឹកជញ្ជូនទាំងមនុស្ស និងចំណីអាហារធំបំផុតមួយទូទាំងសកលលោក ស្របពេលបច្ចុប្បន្នក្រុមហ៊ុនមានទីស្នាក់ការកណ្ដាលនៅអាមេរិក កំពុងព្យាយាមពង្រីកប្រតិបត្តិការរបស់ខ្លួនទូទាំងសកលលោក បន្ទាប់ពីមានគូប្រជែងជាច្រើនដូចជា ក្រុមហ៊ុន Grab ដែលកំពុងពេញនិយមនៅតំបន់អាស៊ីជាដើម៕
