ស្ត្រីមានបំផុតលើលោក ចាយលុយជិត ២ពាន់លានដុល្លារ ទិញភាគហ៊ុនក្នុងក្រុមហ៊ុនថែរក្សាសម្រស់មួយ

មហាសេដ្ឋីស្រីមានបំផុតលើលោក Francois Betterncourt Meyers បានចាយលុយប្រហែល ១,៨៥ពាន់លានដុល្លារ ដើម្បីទិញយកភាគហ៊ុន ១០% នៅក្នុងក្រុមហ៊ុនថែរក្សាសម្រស់ Galderma។

យោងតាមការចុះផ្សាយពីសារព័ត៌មាន Wall Street Journal បានបង្ហាញថា ការទិញយកភាគហ៊ុនក្នុងក្រុមហ៊ុនថែរក្សាសម្រស់មួយនេះ នឹងជួយឲ្យក្រុមហ៊ុន L’Oréal របស់មហាសេដ្ឋីបារាំង ឈរជើងកាន់តែរឹងមាំលើទីផ្សារអន្តរជាតិ។

បន្ថែមពីនោះ ក្រុមហ៊ុនទាំង ២នេះ ក៏បានចុះអនុស្សរណៈយោគយល់ លើកិច្ចសហប្រតិបត្តិការស្រាវជ្រាវ និងអភិវឌ្ឍន៍នូវផលិតផលថែរក្សាសម្រស់ផ្សេងៗ ស្របពេលក្រុមហ៊ុន L’Oréal អះអាងថា ទោះជាពួកគេជាម្ចាស់ភាគហ៊ុនធំមួយមែន តែពួកគេនឹងមិនទាមទារតំណែងក្នុងក្រុមប្រឹក្សាភិបាលនៃក្រុមហ៊ុន Galderma ឡើយ ដើម្បីបង្ហាញពីការគោរពចំពោះរបៀបដឹកនាំក្រុមហ៊ុនមួយនេះ៕