គណ:រដ្ឋមន្ត្រីថៃ អនុម័តទឹកប្រាក់ជាង ១២លានដុល្លារ ដើម្បីលើកកម្ពស់វិស័យទេសចរណ៍បន្ថែម

គណ:រដ្ឋមន្ត្រីថៃ បានយល់ព្រមអនុម័តកញ្ចប់ថវិកាចំនួន ៤៣៣លានបាត (១២,២លានដុល្លារ) សម្រាប់ក្រសួងទេសចរណ៍ និងកីឡា ដើម្បីលើកកម្ពស់វិស័យទេសចរណ៍បន្ថែមទៀត ក្នុងរដូវ Low Season តាមរយៈការផ្សព្វផ្សាយ និងបង្កើតព្រឹត្តិការណ៍ តាមអ៊ីនធឺណិត។ នេះបើតាមការចុះផ្សាយពីសារព័ត៌មាន Bangkok Post។

អាជ្ញាធរទេសចរណ៍ថៃ (TAT) ក៏សង្ឃឹមផងដែរថា នឹងអាចបង្កើនប្រាក់ចំណូលពីទេសចរណ៍ក្នុងស្រុកឲ្យដល់ ២០% ក្នុងចំនួនទឹកប្រាក់ ១,២ទ្រីលានបាត នៅឆ្នាំនេះ ដើម្បីកាត់បន្ថយហានិភ័យពីការពឹងផ្អែកខ្លាំងតែលើទីផ្សារអន្តរជាតិ។

ទន្ទឹមនឹងនេះ រដ្ឋមន្ត្រីក្រសួងទេសចរណ៍ លោក Sermsak Pongpanit បានមានប្រសាសន៍ថា សម្រាប់គម្រោងទីមួយ ក្រសួងរបស់លោកនឹងសហការជាមួយភ្នាក់ងារទេសចរណ៍អនឡាញចំនួនប្រាំបួន ដូចជា Agoda, Meituan, MakeMyTrip, Traveloka, Ascend Travel, Trip, TripAdvisor, Klook និង Tagthai ដើម្បីផ្តល់ជូននូវកញ្ចប់ប្រូម៉ូសិនពិសេសសម្រាប់ការធ្វើដំណើរ ក្នុងអំឡុងខែសីហា ដល់ខែកញ្ញា។

គម្រោងទីមួយនេះ មានតម្លៃ ២៨០លានបាត មានគោលបំណងបង្កើនការកក់ទុកមុន និងអត្រាស្នាក់តាមសណ្ឋាគារ ក៏ដូចជាការកក់សំបុត្រយន្តហោះ ជាមួយក្តីរំពឹងបង្កើនប្រាក់ចំណូលសរុប ២,៨ពាន់លានបាត និងបន្ថែមភ្ញៀវទេសចរយ៉ាងហោចណាស់ ១៨៥ ០០០ នាក់។

ជាមួយគ្នានេះ សម្រាប់គម្រោងទី២ នឹងផ្តោតលើការបង្កើតពិធីបុណ្យ និងព្រឹត្តិការណ៍នានា ក្នុងខែកញ្ញាខាងមុខ ដោយបង្ហាញពីកីឡា សិល្បៈ តន្ត្រី និងវប្បធម៌ជាដើម ខណ:យុទ្ធនាការនេះ នឹងអាចជួយជំរុញដល់ការចំណាយបន្ថែមទៀតរបស់ភ្ញៀវទេសចរ ក្នុងទីក្រុងធំៗ និងលំដាប់ទីពីរ៕