កំពូលអ្នកមានបំផុតលើលោក កើបលុយបានជាង ២០ពាន់លានដុល្លាររយៈពេលមួយសប្ដាហ៍

មហាសេដ្ឋី Elon Musk បានកើនទ្រព្យសម្បត្តិប្រហែល ២២ពាន់លានដុល្លារ បើធៀបនឹងទំហំទ្រព្យសម្បត្តិរបស់លោកកាលពីសប្ដាហ៍មុន បន្ទាប់ពីតម្លៃភាគហ៊ុនក្រុមហ៊ុន Tesla មានកំណើនវិជ្ជមាន។ នេះបើតាមការចុះផ្សាយពីសារព័ត៌មាន Forbes។​

ទន្ទឹមនឹងនោះ ស្ថាបនិកក្រុមហ៊ុន Amazon មហាសេដ្ឋី Jeff Bezos ក៏បានកើបលុយសម្បើមផងដែរ ប្រហែល ៩ពាន់លានដុល្លារ ស្របពេលអ្នកមានបំផុតនៅបារាំង Bernard Arnault កំពុងរំកិលមកកៀកតំណែងលេខរៀងទី៣ ជាកំពូលមហាសេដ្ឋីមានបំផុតវិញ ដ្បិតគម្លាតទ្រព្យសម្បត្តិរវាងលោក និងមេធំ Facebook លោក Mark Zuckerberg មានមិនដល់ ១ពាន់លានដុល្លារផង។

ខាងក្រោមនេះគឺជាបញ្ជីឈ្មោះមហាសេដ្ឋីមានលុយច្រើនបំផុតលើលោកទាំង ១០រូប គិតត្រឹមថ្ងៃទី១៧ ខែសីហា ឆ្នាំ២០២៤៖

1.Elon Musk ប្រធានក្រុមហ៊ុន Tesla មានទ្រព្យសម្បត្តិសរុបប្រមាណ ២៤៤,៨ពាន់លានដុល្លារ

2.Jeff Bezos ស្ថាបនិកក្រុមហ៊ុន Amazon មានទ្រព្យសម្បត្តិសរុបប្រមាណ ១៩៥,៧ពាន់លានដុល្លារ

3.Mark Zuckerberg ស្ថាបនិកក្រុមហ៊ុន Meta Platforms មានទ្រព្យសម្បត្តិប្រមាណ ១៨៤,៨ពាន់លានដុល្លារ

4.Bernard Arnault ប្រធានក្រុមហ៊ុន LVMH មានទ្រព្យសម្បត្តិសរុបប្រមាណ ១៨៤ពាន់លានដុល្លារ

5.Larry Ellison ស្ថាបនិកក្រុមហ៊ុន Oracle មានទ្រព្យសម្បត្តិសរុបប្រមាណ ១៦៩,៨ពាន់លានដុល្លារ

6.Warren Buffett ស្ថាបនិកក្រុមហ៊ុន Berkshire Hathaway មានទ្រព្យសម្បត្តិសរុបប្រមាណ ១៤០ពាន់លានដុល្លារ

7.Larry Page សហស្ថាបនិកក្រុមហ៊ុន Google មានទ្រព្យសម្បត្តិប្រមាណ ១៣៥,៨ពាន់លានដុល្លារ

8.Bill Gates សហស្ថាបនិកក្រុមហ៊ុន Microsoft មានទ្រព្យសម្បត្តិសរុបប្រមាណ ១៣២ពាន់លានដុល្លារ

9.Sergey Brin សហស្ថាបនិកក្រុមហ៊ុន Google មានទ្រព្យសម្បត្តិប្រមាណ ១៣០ពាន់លានដុល្លារ

10.Steve Ballmer អតីត CEO ក្រុមហ៊ុន Microsoft មានទ្រព្យសម្បត្តិប្រមាណ ១២៣,៨ពាន់លានដុល្លារ៕