ប្រទេសរុស្ស៊ីបាននិយាយថា មហាអំណាចលោកខាងលិចកំពុងប្រលែងលេងជាមួយភ្លើង បន្ទាប់ពីអនុញ្ញាតឲ្យប្រទេសអ៊ុយក្រែន បើកការវាយប្រហារលើទឹកដីរុស្ស៊ី ដោយប្រើប្រាស់អាវុធរបស់លោកខាងលិច។ នេះបើតាមការចុះផ្សាយពីសារព័ត៌មាន CNA។
ទន្ទឹមនឹងនោះ រដ្ឋមន្ត្រីការបរទេសរុស្ស៊ី លោក Sergei Lavrov ក៏បានបង្ហើបដែរថា ទង្វើរបស់លោកខាងលិច ជាពិសេសគឺសហរដ្ឋអាមេរិក គឺហាក់ដូចចង់បង្កាត់ភ្លើងសង្គ្រាមលោកលើកទី៣ ឲ្យឆាបឆេះ ពោលគឺធ្វើឲ្យសង្គ្រាមនៅអ៊ុយក្រែនរីករាលដាលពេញពិភពលោក។
ចំពោះមុខអ្នកសារព័ត៌មាននៅទីក្រុងមូស្គូ លោក Lavrov បាននិយាយថា លោកខាងលិចកំពុងលេងជាមួយភ្លើងដ៏ក្ដៅ ហើយអាមេរិកកំពុងចង់ធ្វើឲ្យសង្គ្រាមលោកលើកទី៣ ផ្ទុះឡើង ខណៈបើវាកើតមានមែន អ្នកដែលរងគ្រោះខ្លាំងជាងគេ គឺសហភាពអឺរ៉ុបតែម្ដង។
សូមជម្រាបដែរថា ជានិច្ចកាល រុស្ស៊ីតែងតែព្រមានញឹកញាប់អំពីការលូកដៃរបស់លោកខាងលិច ក្នុងការធ្វើសង្គ្រាមនៅប្រទេសអ៊ុយក្រែន ដ្បិតបើសិនជាមានប្រទេសផ្សេងរួមដៃ នោះរុស្ស៊ីអាចនឹងប្រើប្រាស់អាវុធនុយក្លេអ៊ែរ ដែលបង្កជាសង្គ្រាមលោកលើកទី៣ បានគ្រប់ពេលវេលា៕
