ក្រុមហ៊ុន Samsung SDI ដែលជាបុត្រសម្ព័ន្ធមួយនៃក្រុមហ៊ុនមេ Samsung Electronics របស់ប្រទេសកូរ៉េខាងត្បូង បាននិយាយនៅថ្ងៃពុធ ទី២៨ ខែសីហានេះថា ខ្លួនបានបញ្ចប់កិច្ចព្រមព្រៀងជាមួយក្រុមហ៊ុន General Motors (GM) ដើម្បីសាងសង់រោងចក្រផលិតអាគុយរថយន្តអគ្គិសនីរួមគ្នា នៅក្នុងរដ្ឋ Indiana សហរដ្ឋអាមេរិក។ នេះបើតាមការចុះផ្សាយពីសារព័ត៌មាន Reuters។
ក្រុមហ៊ុន Samsung SDI បាននិយាយនៅក្នុងសេចក្តីថ្លែងការណ៍មួយថា តាមរយ:កិច្ចព្រមព្រៀងខាងលើក្រុមហ៊ុនទាំងពីរនឹងបោះទុនវិនិយោគទឹកប្រាក់ប្រហែល ៣,៥ពាន់លានដុល្លារ ដើម្បីបង្កើតរោងចក្រផលិតអាគុយរថយន្ត EV ដែលមានសមត្ថភាពផលិតប្រចាំឆ្នាំ ២៧ ជីហ្គាវ៉ាត់ម៉ោង (Gwh) ។
គួរឲ្យដឹងថា ផែនការនេះត្រូវបានប្រកាសជាលើកដំបូង នៅក្នុងខែមេសា ឆ្នាំ២០២៣ មកម្លេះ នៅពេលដែលក្រុមហ៊ុន GM និង Samsung SDI បាននិយាយថាការបណ្តាក់ទុនរួមគ្នានឹងត្រូវចំណាយសរុបជាង ៣ពាន់លានដុល្លារ ជាមួយនឹងសមត្ថភាពផលិត ៣០ GWh ដែលបានគ្រោងទុក ហើយប្រតិបត្តិការនឹងត្រូវចាប់ផ្តើមនៅឆ្នាំ២០២៦។
ជម្រាបជូនទៀតផងដែរថា បើតាមក្រុមហ៊ុនផលិតអាគុយខ្នាតយក្សរបស់កូរ៉េខាងត្បូង Samsung SDI បាននិយាយនៅថ្ងៃពុធនេះថារោងចក្ររួមគ្នានេះ មានគោលបំណងផលិតអាគុយទ្រង់ទ្រាយធំ នៅឆ្នាំ២០២៧ ហើយសមត្ថភាពប្រចាំឆ្នាំត្រូវបានគេរំពឹងថានឹងកើនឡើងដល់ ៣៦ GWh ក្រោមផែនការពង្រីកចុងក្រោយបង្អស់៕
