នាយកដ្ឋានពាណិជ្ជកម្មបរទេសស្ថិតក្រោមក្រសួងពាណិជ្ជកម្ម បានបង្ហាញឲ្យដឹងថា ពាណិជ្ជកម្មតាមព្រំដែន និងឆ្លងដែនរបស់ប្រទេសថៃ បានឈានដល់តម្លៃជាង ១៥៨ពាន់លានបាត (៤,៦៩ពាន់លានដុល្លារ) នៅក្នុងខែកក្កដា ពោលគឺបានកើន ២១,៧% បើធៀបទៅនឹងរយ:ពេលដូចគ្នាកាលពីឆ្នាំមុន។ នេះបើតាមការចុះផ្សាយពីសារព័ត៌មាន VNA។
នៅក្នុងអំឡុងខែកក្កដានោះ ការនាំចេញសរុបមានចំនួន ៨៧,១ពាន់លានបាត ដែលឆ្លុះបញ្ចាំងពីការកើនឡើង ១៥,៥% ចំណែកឯការនាំចូលសរុបមានចំនួន ៧១ពាន់លានបាត។
លោក Ronnarong Phoolpipat អគ្គនាយកនៃនាយកដ្ឋានពាណិជ្ជកម្មបរទេស បានមានប្រសាសន៍ថា ការបន្តពង្រីកពាណិជ្ជកម្មតាមព្រំដែន និងឆ្លងកាត់ព្រំដែន គឺជាសក្ខីភាពនៃទីតាំងយុទ្ធសាស្ត្ររបស់ប្រទេសថៃ និងទំនាក់ទំនងសេដ្ឋកិច្ចដ៏រឹងមាំជាមួយប្រទេសជិតខាង។
ទន្ទឹមនឹងនេះ នាយកដ្ឋានពាណិជ្ជកម្មបរទេស ក៏បានបង្ហាញឲ្យដឹងទៀតថា ក្នុងរយៈពេលប្រាំពីរខែដំបូងនៃឆ្នាំ២០២៤នេះ ពាណិជ្ជកម្មតាមព្រំដែន និងឆ្លងព្រំដែនរបស់ប្រទេសថៃ មានចំនួនសរុបជាង ១ទ្រីលានបាត ជាមួយនឹងការនាំចេញកើនឡើង ៥,៩% ដល់ចំនួន ៦២១,៤ពាន់លានបាត និងការនាំចូលមានចំនួន ៤៤៨,៩ពាន់លានបាត កើនឡើង ៤,៧%។
ជម្រាបជូនផងដែរថា ជុំវិញការកើនឡើងដ៏គួរឲ្យកត់សម្គាល់នេះ ត្រូវបានគេសន្មតថា ដោយសារតែមានតម្រូវការខ្លាំង សម្រាប់ផលិតផលថាមពល ជាពិសេសប្រេងម៉ាស៊ូត ព្រមទាំងទំនិញប្រើប្រាស់ ដូចជាកៅស៊ូ និងផលិតផលកៅស៊ូជាដើម៕
