យោងតាមទិន្នន័យផ្លូវការពីឧស្សាហកម្មយានយន្ត បានបង្ហាញឲ្យដឹងនៅថ្ងៃចន្ទ ទី៩ ខែកញ្ញានេះថា ការលក់រថយន្តប្រភេទដឹកអ្នកដំណើរនៅក្នុងប្រទេសចិន បានបន្តធ្លាក់ចុះសម្រាប់រយ:ពេល ៥ខែជាប់ៗគ្នា គិតនៅត្រឹមខែសីហា បើទោះបីជាការលក់រថយន្តអគ្គិសនី និងប្រភេទកូនកាត់ Hybrid មានចំនួនកើនឡើងក៏ដោយ។ នេះបើតាមការចុះផ្សាយពីសារព័ត៌មាន CNA។
ជាមួយគ្នានេះ ទិន្នន័យពីសមាគមរថយន្តដឹកអ្នកដំណើររបស់ប្រទេសចិនបានបង្ហាញឲ្យដឹងទៀតថា ក្នុងខែសីហា ការលក់សរុបបានធ្លាក់ចុះ ១,១% ធៀបនឹងរយ:ពេលដូចគ្នាកាលពីឆ្នាំមុន មកនៅត្រឹមចំនួន ១,៩២ លានគ្រឿងប៉ុណ្ណោះ។
ទោះជាយ៉ាងណាក៏ដោយ ការលក់រថយន្តអគ្គិសនី បានកើនឡើងដល់ជាង ៤៣% ឬស្មើនឹង ៥៣,៥% នៃការលក់រថយន្តសរុប ខណ:ត្រូវបានជំរុញដោយការលក់របស់ក្រុមហ៊ុនរថយន្តក្នុងស្រុក BYD និងក្រុមហ៊ុនគូប្រជែងរបស់សហរដ្ឋអាមេរិក Tesla។
ទន្ទឹមនឹងនេះ ការនាំចេញរថយន្តរបស់ប្រទេសចិន បានកើនឡើងដល់ ២៤% ផងដែរគិតនៅក្នុងខែសីហា បន្ទាប់ពីមានការកើនឡើង ២០% នៅក្នុងខែកក្កដា។
សមាគមរថយន្តដឹកអ្នកដំណើររបស់ប្រទេសចិន បានបង្ហាញឲ្យដឹងទៀតថា ជុំវិញការធ្លាក់ចុះនៃការលក់នេះ គឺបណ្តាលមកពីតម្រូវការអ្នកប្រើប្រាស់រថយន្តក្នុងស្រុកធ្លាក់ចុះ ចំពេលរដ្ឋាភិបាលបានដាក់ចេញវិធានការលើកទឹកចិត្តដោយផ្តល់ការឧបត្ថម្ភធន សម្រាប់ការផ្លាស់ប្តូរថយន្តចាស់ៗ ជាមួយនឹងរថយន្តអគ្គិសនី ដែលជាហេតុធ្វើឲ្យការទិញរថយន្តថ្មីៗមានការធ្លាក់ចុះ៕
