រដ្ឋាភិបាលប្រទេសចិន កាលពីពេលថ្មីៗនេះ ត្រូវបានគេរាយការណ៍មកថា កំពុងត្រៀមខ្លួនរួចរាល់ហើយ ក្នុងការបញ្ចេញកញ្ចប់ទឹកប្រាក់ចំនួន ២០០ពាន់លានយ៉ន់ (២៨ពាន់លានដុល្លារ) សម្រាប់គម្រោងវិនិយោគដោយរដ្ឋាភិបាលក្នុងតំបន់ នៅឆ្នាំនេះ ដើម្បីឈានដល់គោលដៅកំណើនសេដ្ឋកិច្ចដ៏មានមហិច្ឆតារបស់ខ្លួន។ នេះតាមការចុះផ្សាយពីសារព័ត៌មាន CNN។
ជុំវិញកញ្ចប់ថវិកាជំរុញសេដ្ឋកិច្ចដ៏ធំនេះ ត្រូវបានប្រកាសដោយទីភ្នាក់ងាររៀបចំផែនការកំពូលរបស់ប្រទេសគឺ គណៈកម្មាធិការអភិវឌ្ឍ និងកំណែទម្រង់ជាតិ (NDRC) នៅក្នុងសន្និសីទសារព័ត៌មានដែលបានធ្វើឡើងកាលពីថ្ងៃអង្គារ។
លោក Zheng Shanjie ប្រធានគណៈកម្មការ បានប្រាប់អ្នកយកព័ត៌មាននៅទីក្រុងប៉េកាំងថា ៖”យើងមានទំនុកចិត្តក្នុងការសម្រេចបាននូវគោលដៅ និងភារកិច្ចអភិវឌ្ឍសេដ្ឋកិច្ច និងសង្គមប្រចាំឆ្នាំ រួមទាំងការរក្សាបាននូវការអភិវឌ្ឍសេដ្ឋកិច្ច និងសង្គមប្រកបដោយចីរភាព និងស្ថិរភាព”។
ប្រទេសចិន បានប្រកាសពីគោលដៅកំណើនសេដ្ឋកិច្ចរបស់ខ្លួន ៥% កាលពីក្នុងខែមីនា ប៉ុន្តែយ៉ាងណាក៏ដោយទិន្នន័យសេដ្ឋកិច្ចជាបន្តបន្ទាប់ ហាក់មានភាពទន់ខ្សោយខ្លាំងដែលធ្វើឲ្យអ្នកវិភាគសេដ្ឋកិច្ចព្រួយបារម្ភថាគោលដៅកំណើននេះ អាចនឹងត្រូវខកខាន។ ប្រទេសដែលមានសេដ្ឋកិច្ចធំបំផុតទីពីររបស់ពិភពលោក នៅតែបន្តស្ថិតក្នុងស្ថានភាពមិនល្អ ជាពិសេសទទួលរងពីវិបត្តិអចលនទ្រព្យ ការចំណាយចុះខ្សោយ អត្រាអត់ការងារធ្វើរបស់យុវជនខ្ពស់ ដែលស្ថិតក្នុងចំណោមបញ្ហាផ្សេងៗទៀត។
ជុំវិញបញ្ហាទាំងនេះ លោក Zheng បាននិយាយថា ដើម្បីជួយរដ្ឋាភិបាលក្នុងតំបន់ដែលកំពុងជួបបញ្ហាជាមួយគំនរនៃបំណុល រដ្ឋាភិបាលទីក្រុងប៉េកាំង នឹងផ្តល់ទឹកប្រាក់ចំនួន ១០០ពាន់លានយន់ (១៤ពាន់លានដុល្លារ) ដែលយកចេញពីថវិការបស់រដ្ឋាភិបាលកណ្តាល និង ១០០ពាន់លានយ៉ន់បន្ថែមទៀត សម្រាប់គម្រោងវិនិយោគផ្សេងៗ។
ទន្ទឹមនឹងនេះ ក្រុមអ្នកសេដ្ឋកិច្ច ក៏រំពឹងទុកផងដែរថាវិធានការសារពើពន្ធបន្ថែមទៀតដែលមានតម្លៃសរុបប្រហែល ទី្រលានយ៉ន់ (២៨៥ពាន់លានដុល្លារ) នឹងត្រូវប្រកាសក្នុងខែតុលានេះផងដែរ បន្ទាប់ពីមេដឹកនាំកំពូលចិន លោក ស៊ី ជិនពីង នៅទីបំផុតបានផ្តល់ការយល់ព្រមកាលពីចុងខែកញ្ញា ចំពោះផែនការផ្តល់កំណើនសេដ្ឋកិច្ចរបស់ខ្លួន៕
