មន្ត្រីជាន់ខ្ពស់របស់សហរដ្ឋអាមេរិកម្នាក់ បាននិយាយថា ក្រុមហ៊ុនផលិតរ៉ែលីចូមរបស់ប្រទេសចិន កំពុងតែធ្វើឲ្យជន់លិចទីផ្សារពិភពលោក ជាមួយនឹងការផលិតដ៏ច្រើនលើសលប់ ដែលជាហេតុបណ្តាលឲ្យតម្លៃលោហៈធាតុដ៏សំខាន់នេះ ធ្លាក់ចុះតម្លៃខ្លាំង។ នេះបើតាមការចុះផ្សាយពីសារព័ត៌មាន Reuters។
លោក Jose Fernandez អនុលេខាធិការផ្នែកកំណើនសេដ្ឋកិច្ច ថាមពល និងបរិស្ថាន ប្រចាំនៅក្រសួងការបរទេសសហរដ្ឋអាមេរិក បានប្រាប់សន្និសីទសារព័ត៌មានមួយកាលពីដើមសប្តាហ៍នេះថា ប្រទេសចិនកំពុងផលិតលីចូមច្រើនជាងតម្រូវការរបស់ពិភពលោកនាពេលបច្ចុប្បន្ននេះ។
គួរឲ្យដឹងផងដែរថា កន្លងមកសហភាពអឺរ៉ុប ធ្លាប់មានបំណងកាត់បន្ថយការពឹងផ្អែករបស់ខ្លួន លើការនាំចូលរ៉ែលីចូមពីប្រទេសចិន និងប្រទេសដទៃទៀតនៃលីចូម ដើម្បីឆ្ពោះទៅរកការផ្លាស់ប្តូរពណ៌បៃតង។
ប៉ុន្តែទោះជាយ៉ាងណាក៏ដោយ លោក Fernandez បាននិយាយថា ៖ “ចិនកំពុងស្វែងរកវិធីដើម្បីជាការសងសឹកវិញ ជាមួយនឹងការបង្កើនការផលិតលីចូមច្រើនលើសលប់ ដែលជាហេតុធ្វើឲ្យខូចតម្លៃលើទីផ្សារសកល រហូតដល់ថ្នាក់លែងមានការប្រកួតប្រជែង។ ទង្វើនេះ ហាក់កំពុងរារាំងសមត្ថភាពរបស់យើង ក្នុងការធ្វើពិពិធកម្មខ្សែសង្វាក់ផ្គត់ផ្គង់ក្នុងកម្រិតសកលលោកហើយថែមទាំងធ្វើឲ្យប៉ះពាល់ដល់ប្រទេសផលិតលីចូប ដូចជាព័រទុយហ្គាល់ដែលត្រូវការការវិនិយោគដើម្បីអភិវឌ្ឍឧស្សាហកម្មទាំងនេះ ផងដែរ”។
ជម្រាបជូនថា ប្រទេសចិនមានចំនួនប្រហែល២ភាគ៣ នៃទិន្នផលរ៉ែលីចូមរបស់ពិភពលោក ដែលភាគច្រើនត្រូវបានប្រើប្រាស់នៅក្នុងបច្ចេកវិទ្យាផលិតអាគុយ រួមទាំងសម្រាប់ប្រើក្នុងរថយន្តអគ្គិសនីផងដែរ។ តម្លៃលីចូមបានធ្លាក់ចុះជាង ៨០% ក្នុងរយ:ពេលប៉ុន្មានឆ្នាំកន្លងមកនេះ ខណ:ភាគច្រើនគឺដោយសារតែការផលិតលើសកម្រិតពីសំណាក់ប្រទេសចិន និងការធ្លាក់ចុះតម្រូវការរថយន្តអគ្គិសនី៕
