ទ្រព្យសម្បត្តិសរុបរបស់មហាសេដ្ឋីអាមេរិក លោក Elon Musk ត្រូវបានគេរាយការណ៍ថា បានធ្លាក់ចុះអស់ ១៥ពាន់លានដុល្លារ បន្ទាប់ពីការបញ្ចេញរ៉ូបូតតាក់ស៊ី Cybercab របស់ក្រុមហ៊ុន Tesla កាលពីពេលថ្មីៗនេះ។
នាយកប្រតិបត្តិក្រុមហ៊ុន Tesla រូបនេះ បានមើលឃើញទ្រព្យសម្បត្តិរបស់ខ្លួន ធ្លាក់ចុះមកនៅប្រហែល ២៤០ពាន់លានដុល្លារ ប៉ុណ្ណោះ បន្ទាប់ពីការប្រកាសចេញផលិតផលថ្មីៗរបស់ក្រុមហ៊ុន Tesla កាលពីសប្តាហ៍មុន។ ទោះបីជាយ៉ាងណាក៏ដោយ លោក Musk នៅតែជាបុគ្គលដែលមានទ្រព្យសម្បត្តិច្រើនជាងគេបំផុតរបស់ពិភពលោក គិតត្រឹមថ្ងៃពុធ ទី១៦ ខែតុលានេះ។ នេះបើការចុះផ្សាយពីសារព័ត៌មាន Bloomberg ។
គួរឲ្យដឹងថា ក្រោយព្រឹត្តិការណ៍នេះ ភាគហ៊ុនរបស់ក្រុមហ៊ុន Tesla បានធ្លាក់ចុះជិត ១០% ពីតម្លៃប្រហែល ២៤០ដុល្លារក្នុងមួយហ៊ុន មកត្រឹម ២១៧ដុល្លារក្នុងមួយហ៊ុន ប៉ុណ្ណោះ។
គួរឲ្យដឹងថា ក្នុងអំឡុងពេលព្រឹត្តិការណ៍ “We, Robot” ដែលបានធ្វើឡើងកាលពីថ្ងៃទី១០ ខែតុលា កន្លងទៅ ក្រុមហ៊ុន Tesla បានបញ្ចេញរ៉ូបូតតាក់ស៊ីដំបូងរបស់ខ្លួនឈ្មោះថា Cybercab ដែលមានតម្លៃខ្ទង់ ៣ម៉ឺនដុល្លារ រួមទាំង Robovan ដែលស្រដៀងទៅនឹងរថយន្តក្រុង ក៏ដូចជាមនុស្សយន្ត Optimus ផងដែរ។
ជម្រាបជូនផងដែរថា បើទោះបីជាព្រឹត្តិការណ៍នេះ ទទួលបានកោតសរសើរពីមនុស្សមួយចំនួនក៏ដោយ ប៉ុន្តែអ្នកវិភាគផ្សេងទៀត ហាក់មិនបានចាប់អារម្មណ៍នឹងការប្រកាសចេញបច្ចេកវិទ្យាថ្មីទាំងនេះឡើយ ដោយពួកគេគិតថា ព្រឹត្តិការណ៍នេះគ្រាន់តែជាការសម្ញែង និងខ្វះព័ត៌មានលម្អិតជាច្រើនដែលមនុស្សកំពុងស្វែងរក៕
