តម្លៃភាគហ៊ុនរបស់ក្រុមហ៊ុនអវកាសធំៗ ត្រូវបានគេមើលឃើញថា បានហក់ឡើងយ៉ាងខ្លាំង បន្ទាប់ពីក្រុមហ៊ុន SpaceX របស់មហាសេដ្ឋីកំពូល Elon Musk ទទួលបានភាពជោគជ័យជាប្រវត្តិសាស្រ្ត ក្នុងការតេស្តសាកល្បងបាញ់បង្ហោះយាន Starship លើកទីប្រាំរបស់ខ្លួន។ នេះបើតាមការចុះផ្សាយពីសារព័ត៌មាន MarketWatch។
គួរឲ្យដឹងថា កាលពីពេលថ្មីៗនេះ SpaceX ទទួលបានភាគជ័យនៃការចាប់យករ៉ុក្កែត Super Heavy Booster ដែលរុញយាន Starship ទៅកាន់លំហរនោះ អាចចុះចតមកកាន់ជើងទម្រដែលមានដៃចាប់ នៅលើផ្ទៃផែនដីវិញ ដោយរលូននិងសុវត្ថិភាពបំផុត ជាមួយនឹងការរក្សារូបរាងបានទាំងស្រុង ខណ:ការធ្វើតេស្តមុនៗ គឺបានត្រឹមចុះចតនៅក្នុងសមុទ្រ និងត្រូវបានបំផ្ទុះចោលលើអាកាស ប៉ុណ្ណោះ។
យ៉ាងណាមិញ ភាពជោគជ័យដ៏ធំនៃការតេស្តសាកល្បងរបស់ក្រុមហ៊ុន SpaceX លើកនេះ ហាក់កំពុងទាញចំណាប់អារម្មណ៍កាន់តែខ្លាំងមកលើវិស័យអវកាសបន្ថែមទៀត ក្រោយតម្លៃភាគហ៊ុនរបស់ក្រុមហ៊ុនអវកាសជាច្រើន កំពុងកើនឡើងយ៉ាងខ្លាំង នៅក្នុងទីផ្សារ។
មួយក្នុងចំណោមននោះ ភាគហ៊ុនរបស់ក្រុមហ៊ុនរុករកអវកាស Intuitive Machines Inc. បានកើនឡើង ១,៦% ខណៈក្រុមហ៊ុន AST SpaceMobile Inc ក៏បានកើនឡើងដល់ប្រហែល ០,៥% ផងដែរ។
ទន្ទឹមនឹងនេះ តម្លៃភាគហ៊ុនរបស់ Rocket Lab USA បានកើនឡើង ០,៩% ខណៈពេលដែលភាគហ៊ុនរបស់ Redwire Corp ដែលជាក្រុមហ៊ុនផលិត និងផ្គត់ផ្គង់ឧបករណ៍អវកាស បានកើនឡើង ៣,២%។ ដោយឡែក ក្រុមហ៊ុនផ្តល់សេវាទេសចរណ៍អវកាស Virgin Galactic Holdings ក៏ឃើញថាភាគហ៊ុនរបស់ពួកគេ កើន ០,២% ផងដែរ៕
