យោងតាមប្រព័ន្ធផ្សព្វផ្សាយរដ្ឋវៀតណាម បានរាយការណ៍ថា គម្រោងសាងសង់ផ្លូវដែកថ្មីមួយ ដែលតភ្ជាប់រវាងប្រទេសវៀតណាម ជាមួយខេត្តយូណាន ប្រទេសចិន អាចនឹងត្រូវចំណាយទឹកប្រាក់អស់ ១៧៩ទ្រីលានដុង ឬស្មើនឹងប្រមាណ ៧,២ពាន់លានដុល្លារ។
គម្រោងផ្លូវរថភ្លើងដែលមានប្រវែងសរុប ៤២៧ គីឡូម៉ែត្រ នឹងត្រូវតភ្ជាប់ពីខេត្តជាប់ព្រំដែនប្រទេសឡាវ Cai បន្តឆ្លងកាត់រដ្ឋធានីហាណូយ និងទីក្រុងកំពង់ផែ Haiphong ឆ្ពោះទៅកាន់ទីក្រុង Ha Long ។ នេះបើតាមការបញ្ជាក់ពីទីភ្នាក់ងារសារព័ត៌រដ្ឋ Vietnam News Agency ។
គួរឲ្យដឹងផងដែរថា អាជ្ញាធរផ្លូវដែកវៀតណាម បានបញ្ជូនគម្រោងសាងសង់ផ្លូវរថភ្លើង Lao Cai-Ha Long នេះ ទៅក្រសួងដឹកជញ្ជូនរួចរាល់ហើយ ដើម្បីពិនិត្យមើល និងរង់ចាំការអនុម័ត។
ការសាងសង់ផ្លូវដែកនេះ ត្រូវបានគេរំពឹងថានឹងចាប់ផ្តើមនៅក្នុងឆ្នាំ២០៣០ ដោយវានឹងជួយបន្ថែមតម្រូវការដឹកជញ្ជូនយ៉ាងសំខាន់របស់វៀតណាម ខណ:ផ្លូវដែកថ្មីនេះ ត្រូវបានប៉ាន់ប្រមាណថានឹងអាចដឹកជញ្ជូនអ្នកដំណើរ ៨,៣ លាននាក់ និងទំនិញ ១៧,៥ លានតោន ក្នុងមួយឆ្នាំ នៅឆ្នាំ២០៥០។
ជម្រាបជូនផងដែរថា ក្រៅតែពីគម្រោងផ្លូវដែកថ្មីនេះ រដ្ឋសភាវៀតណាម ក៏ត្រូវបានគេរំពឹងថានឹងអនុម័តផែនការតម្លៃ ៦៧ពាន់លានដុល្លារ ផ្សេងទៀត ដើម្បីសាងសង់ផ្លូវរថភ្លើងល្បឿនលឿនប្រវែង ១ ៥៤១ គីឡូម៉ែត្រ ពីទីក្រុងហាណូយ ទៅកាន់មជ្ឈមណ្ឌលពាណិជ្ជកម្មទីក្រុងហូជីមិញ ដែលជាគម្រោងហេដ្ឋារចនាសម្ព័ន្ធដ៏ធំបំផុតមិនធ្លាប់មានរបស់ប្រទេស ផងដែរ៕
