លោកស្រី Ding Yumei អតីតភរិយារបស់លោក Hui Ka-yan ដែលជាស្ថាបនិកក្រុមហ៊ុនអចលនទ្រព្យខ្នាតយក្សចិន Evergrande កំពុងប្រឈមុខទៅនឹងការរឹបអូសផ្ទះជាច្រើនកន្លែងនៅជុំវិញពិភពលោក ដើម្បីធ្វើជាផលប្រយោជន៍ដល់ម្ចាស់បំណុល។ នេះបើតាមការចុះផ្សាយពីសារព័ត៌មាន Bloomberg។
ប្រភពដដែលនេះ បានបង្ហាញឲ្យដឹងទៀតថា ក្នុងចំណោមផ្ទះដ៏មានតម្លៃបំផុតដែលលោកស្រី Ding កំពុងកាន់កាប់ រួមមានខុនដូដ៏ប្រណីតមួយស្ថិតនៅចំកណ្តាលទីក្រុង Vancouver ប្រទេសកាណាដា និងផ្ទះជាច្រើនខ្នងទៀតនៅចក្រភពអង់គ្លេស មានតម្លៃសរុបប្រមាណ ២៨៥លានដុល្លារ។
យ៉ាងណាមិញ Evergrande ដែលជាក្រុមហ៊ុនជំពាក់បំណុលច្រើនបំផុតលើពិភពលោក នៅតែបន្តព្យាយាមទាញយកទ្រព្យសកម្មរបស់ខ្លួន នៅទូទាំងពិភពលោក ដើម្បីដោះស្រាយបំណុល ដូច្នេះមានន័យថាទ្រព្យសម្បត្តិរបស់លោកស្រី Ding ដែលធ្លាប់ជាប់ទាក់ទងជាមួយក្រុមហ៊ុនទាំងប៉ុន្មាន ក៏កំពុងប្រឈមមុខនឹងការរឹបអូស ឬលក់ដើម្បីសងម្ចាស់បំណុលវិញ ផងដែរ។
មិនតែប៉ុណ្ណោះ តុលាការនៅទីក្រុងហុងកុង និងទីក្រុងឡុងដ៍ ក៏បានផ្តល់ដីកាបង្កកទ្រព្យសម្បត្តិនៅទូទាំងពិភពលោក របស់លោកស្រី Ding កាលពីខែកក្កដា ផងដែរ ដែលជាផ្នែកមួយនៃកិច្ចខិតខំប្រឹងប្រែងក្នុងការទាញយកទឹកប្រាក់ចំនួន ៦ពាន់លានដុល្លារពីលោកស្រី រួមទាំងលោក Hui និងអតីតថ្នាក់ដឹកនាំរបស់ក្រុមហ៊ុន Evergrande ផ្សេងទៀត។
ទន្ទឹមនឹងនេះ លោក Daniel Margulies តំណាងក្រុមហ៊ុនច្បាប់ Dechert ប្រចាំនៅទីក្រុងហុងកុង ដែលមានជំនាញក្នុងការរៀបចំរចនាសម្ព័ន្ធបំណុលឡើងវិញ និងការក្ស័យធនឆ្លងប្រទេស បាននិយាយថា៖ “វាអាចបង្កើតជាមូលដ្ឋានគ្រឹះសម្រាប់សកម្មភាពផ្សេងទៀត នាពេលអនាគត ដែលក្រុមហ៊ុនជាប់បំណុល អាចនាំយកមកវិញនូវទ្រព្យសម្បត្តិជាប់ទាក់ទងរបស់ខ្លួន សម្រាប់ធ្វើជាប្រយោជន៍ដល់ម្ចាស់បំណុលបាន” ៕
