នាយកប្រតិបត្តិក្រុមហ៊ុន Tesla លោក Elon Musk កាលពីពេលថ្មីៗនេះ បាននិយាយថា មនុស្សយន្តអាចនឹងមានចំនួនច្រើនជាងមនុស្ស ក្នុងរយៈពេលតិចជាង ២០ឆ្នាំខាងមុខ។ នេះបើតាមការចុះផ្សាយពីសារព័ត៌មានធំៗជាច្រើន។
ក្នុងអំឡុងពេលបង្ហាញខ្លួននៅឯព្រឹត្តិការណ៍ Future Investment Initiative ដែលជាវិទ្យាស្ថានបង្កើតឡើងដោយមូលនិធិវិនិយោគសាធារណៈរបស់ប្រទេសអារ៉ាប៊ីសាអូឌីត លោក Musk បាននិយាយថា ៖”ខ្ញុំគិតថានៅឆ្នាំ ២០៤០ ខាងមុខ ចំនួនមនុស្សយន្ត ប្រហែលអាចនឹងមានច្រើនជាងចំនួនមនុស្ស” ។
តាមការប៉ាន់ស្មាននោះ មនុស្សយន្តប្រហែល ១០ ពាន់លានគ្រឿង រំពឹងថានឹងត្រូវដាក់ឲ្យប្រើប្រាស់ នៅជុំវិញពិភពលោក ខណ:មហាសេដ្ឋីកំពូលរូបនេះ បាននិយាយទៀតថា សម្រាប់មនុស្សយន្តដែលមានសមត្ថភាពអាចធ្វើអ្វីក៏បាន ទំនងជាមានតម្លៃចន្លោះពី ២ម៉ឺនដុល្លារ ទៅ ២៥ ០០០ដុល្លារ ក្នុងមួយគ្រឿង។
រំលឹកផងដែរថា កាលពីដើមខែនេះ Elon Musk បានដាក់បង្ហាញនូវមនុស្សយន្ត Optimus របស់ក្រុមហ៊ុន Tesla ដែលមានសមត្ថភាពអាចធ្វើកិច្ចការងារជំនួសដៃជើងមនុស្សបានជាច្រើន ជាពិសេសថែមទាំងអាចប្រាស្រ័យទាក់ទងជាមួយមនុស្សបានថែមទៀតផង។
មិនតែប៉ុណ្ណោះ លោក Elon Musk មានសុទិដ្ឋិនិយមថាចំនួនមនុស្សយន្តនឹងមានកើនឡើងច្រើន នាពេលអនាគត ដោយសារតែការរីកចម្រើនយ៉ាងឆាប់រហ័សនៃបច្ចេកវិទ្យា Generative Artificial Intelligence (Gen AI)។ សព្វថ្ងៃនេះ ស្ទើរតែគ្រប់ក្រុមហ៊ុនបច្ចេកវិទ្យាខ្នាតយក្សទាំងអស់ កំពុងផ្តល់ជូននូវកំណែឧបករណ៍ និងវេទិកា Gen AI របស់ខ្លួនឲ្យកាន់តែប្រសើរឡើង ដើម្បីជួយសម្រួល និងអនុវត្តកិច្ចការប្រចាំថ្ងៃ ជាច្រើន៕
