ការនាំចេញដែកថែបរបស់ប្រទេសចិន នៅក្នុងខែតុលា បានឈានដល់កម្រិតខ្ពស់បំផុតមិនធ្លាប់មាន រយ:ពេល ៩ឆ្នាំចុងក្រោយ បន្ទាប់ពីត្រូវបានជំរុញដោយតម្រូវការខ្លាំងនៅក្រៅប្រទេស បើទោះបីមានភាពតានតឹងផ្នែកពាណិជ្ជកម្ម ក្រោយការបោះឆ្នោតនៅសហរដ្ឋអាមេរិក ក៏ដោយ។ នេះបើតាមការចុះផ្សាយពីសារព័ត៌មាន Bloomberg។
ការនាំចេញដែករបស់ចិន បានកើនឡើងដល់ ១១,២ លានតោន កាលពីខែមុន ពោលគឺបានកើនឡើង ៤០,៨% បើធៀបរយ:ពេលដូចគ្នា កាលពីឆ្នាំមុន ខណ:នេះជាកម្រិតដ៏ខ្ពស់បំផុតមួយ គិតចាប់តាំងពីខែកញ្ញា ឆ្នាំ២០១៥ មក។ នេះបើយោងតាមទិន្នន័យទទួលបានពីរដ្ឋបាលគយចិន។
ទន្ទឹមនឹងនេះ លោក Ma Zhipan អ្នកវិភាគប្រចាំក្រុមហ៊ុន Chaos Ternary Futures បាននិយាយថា ការនាំចេញដែកថែបរបស់ចិន នៅក្នុងខែតុលា បានកើនឡើងខ្ពស់លើសពីការរំពឹងទុក ដែលបង្ហាញថាក្រុមហ៊ុនផលិតកំពុងប្រញាប់ប្រញាល់ ក្នុងការនាំចេញផលិតផលរបស់ខ្លួន មុនពេលការដំឡើងពន្ធថ្មីអាចកើតមាន ក្រោយការបោះឆ្នោតនៅអាមេរិក។
មិនតែប៉ុណ្ណោះ លោក Ma បានបង្ហាញក្តីរំពឹងទុកទៀតថា ការនាំចេញដែករបស់ចិន ទៅក្រៅប្រទេសនឹងបន្តកើនឡើងកាន់តែច្រើន នៅក្នុងខែវិច្ឆិកា និងធ្នូ ឆ្នាំនេះ។
ជម្រាបជូនផងដែរថា នៅក្នុងឆ្នាំ២០២៣ ប្រទេសចិន បានបង្កើនការនាំចេញផលិតផលដែករបស់ខ្លួន ៣៦,២% ដល់ចំនួន ៩០,៣ លានតោន ស្របពេលការនាំចូល មានចំនួន ៧,៦៤ លានតោន ធ្លាក់ចុះ ២៧,៦% បើធៀបនឹងឆ្នាំ២០២២៕
