តម្លៃរូបិយប័ណ្ណគ្រីបតូ Bitcoin បានហក់ឡើងដល់ជិត ៩ម៉ឺនដុល្លារជាលើកដំបូង គិតត្រឹមថ្ងៃអង្គារ ទី១២ ខែវិច្ឆិកា ដែលជាតម្លៃដ៏ខ្ពស់បំផុតមិនធ្លាប់មាន ចាប់តាំងពីកាក់គ្រីបតូនេះ ត្រូវបានដាក់ឲ្យប្រើប្រាស់មក។ នេះបើតាមការចុះផ្សាយពីសារព័ត៌មាន Bloomberg។
កាក់ Bitcoin បានកើនឡើងតម្លៃប្រហែល ៣២% គិតចាប់តាំងពីការបោះឆ្នោតនៅសហរដ្ឋអាមេរិកកាលពីថ្ងៃទី៥ ខែវិច្ឆកា មក ដោយបានឈានដល់កម្រិតខ្ពស់បំផុតមិនធ្លាប់មានដល់ចំនួន ៨៩ ៥៩៩ដុល្លារ កាលពីថ្ងៃអង្គារ។ ការហក់ឡើងដ៏ខ្ពស់នេះ គឺបានកើតឡើងក្រោយលោក ដូណាល់ ត្រាំ ដែលត្រូវបានគេចាត់ទុកថាជាអ្នកគាំទ្ររូបិយប័ណ្ណគ្រីបតូដ៏ធំបំផុតម្នាក់ ជាប់ឆ្នោតជាប្រធានាធិបតីអាមេរិកជាថ្មី។
គួរឲ្យដឹងផងដែរថា កន្លងមក លោក ត្រាំ ធ្លាប់បានប្តេជ្ញាចិត្តថា នឹងធ្វើឲ្យការប្រើប្រាស់កាក់គ្រីបតូកាន់តែមានភាពទូលំទូលាយជាងមុន រួមទាំងការបង្កើតឃ្លាំងស្តុក Bitcoin និងធ្វើឲ្យសហរដ្ឋអាមេរិកក្លាយជាទីផ្សារគ្រីបតូដ៏ធំបំផុតរបស់ពិភពលោក ផងដែរ។
ជម្រាបជូនថា ជំហររបស់លោក ត្រាំ នេះ គឺហាក់ផ្ទុះស្រឡះពីការដឹកនាំរបស់លោកប្រធានាធិបតី លោក ចូ បៃដិន ដែលធ្លាប់តែរឹតបន្តឹងខ្លាំងទៅលើការប្រើប្រាស់រូបិយប័ណ្ណគ្រីបតូ។ ស្របពេលការផ្លាស់ប្តូរនេះ បានរុញច្រានឲ្យកាក់គ្រីបតូផ្សេងៗទៀត កើនឡើងតម្លៃរបស់ខ្លួនផងដែរ និងធ្វើឲ្យទីផ្សាររូបិយប័ណ្ណគ្រីបតូសរុប ហក់ដល់តម្លៃប្រហែល ៣,១ទ្រីលានដុល្លារ។នេះបើតាទិន្នន័យទទួលបានពី CoinGecko៕
