បុរសវ័យ ១៩ឆ្នាំម្នាក់ ឈ្មោះ Giuseppe D’Anna ដែលត្រូវបានគេស្គាល់ថាជាតារា TikTok ដ៏ល្បីល្បាញម្នាក់របស់អ៊ីតាលី បានធ្វើឲ្យអ្នកលេងបណ្តាញសង្គមភ្ញាក់ផ្អើលយ៉ាងខ្លាំង បន្ទាប់ពីលោកបានស្នើសុំមិត្តស្រីវ័យ ៧៦ឆ្នាំដែលត្រូវបានគេរាយការណ៍ថាជាមហាសេដ្ឋី ភ្ជាប់ពាក្យ។
ក្នុងឃ្លីបមួយ Giuseppe D’anna បានបង្ហាញពីគ្រាដ៏រ៉ូមែនទិកបំផុតមួយ ដោយលុតជង្គង់នៅចំពោះមិត្តស្រីរបស់ខ្លួន និងបានរំលឹកកាលពីពេលជួបគ្នាដំបូង ដោយនិយាយថាគ្រាន់តែឃើញភ្លាមក៏ចាប់ចិត្តប្រតិព័ទ្ធលើគាត់ភ្លែតតែម្តង។
តាមរយ:វីដេអូបង្ហោះនៅលើបណ្តាញសង្គម Tiktok ដែល Giuseppe ស្នើសុំមិត្តស្រីវ័យ ៧៦ឆ្នាំរបស់ខ្លួន ភ្ជាប់ពាក្យនេះ បានធ្វើឲ្យមានការចាប់អារម្មណ៍យ៉ាងខ្លាំងពីសំណាក់អ្នកលេងបណ្តាញសង្គម ដោយទទួលបានការចូលមើលដល់ទៅជាង ៧,៥ លានដង ឯណោះ។
ប៉ុន្តែទោះជាយ៉ាងណាក៏ដោយ អ្នកលេងបណ្តាញសង្គមជាច្រើនបាននាំគ្នាចូលទៅបញ្ចេញមតិថា តារា TikTok រូបនេះ គឺគ្រាន់តែធ្វើឡើងដើម្បីទទួលបានការចាប់អារម្មណ៍ ខណ:អ្នកខ្លះទៀតបាននិយាយថា Giuseppe D’anna គឺត្រូវបង្ខំចិត្តធ្វើវាដើម្បីតែលុយប៉ុណ្ណោះ៕
