ប្រធានាធិបតីជាប់ឆ្នោត លោក ដូណាល់ ត្រាំ បានប្រកាសតែងតាំងមហាសេដ្ឋីវិនិយោគ លោក Warren Stephens ឲ្យធ្វើជាឯកអគ្គរដ្ឋទូតអាមេរិកថ្មី ប្រចាំនៅចក្រភពអង់គ្លេស។ នេះបើតាមការចុះផ្សាយពីសារព័ត៌មាន BBC។
នៅក្នុងសេចក្តីថ្លែងការណ៍មួយ លោក ត្រាំ បាននិយាយនៅលើបណ្តាញសង្គម Truth Social របស់ខ្លួនថា ៖”លោក Stephens តែងតែស្រមៃចង់បម្រើសហរដ្ឋអាមេរិកពេញម៉ោង។ ខ្ញុំរំភើបដែលឥឡូវគាត់នឹងមានឱកាសធ្វើកិច្ចការងារនេះ ក្នុងនាមជាអ្នកការទូតកំពូលតំណាងសហរដ្ឋអាមេរិក នៅក្នុងប្រទេសដែលជាសម្ព័ន្ធមិត្តដ៏ជិតស្និទ្ធរបស់យើង”។
គួរឲ្យដឹងផងដែរថា លោក Warren Stephens ដែលជានាយកប្រតិបត្តិនៃធនាគារវិនិយោគឯកជន Stephens Inc បានបរិច្ចាគទឹកប្រាក់រាប់លានដល់យុទ្ធនាការបោះឆ្នោតជាប្រធានាធិបតីរបស់លោក ត្រាំ នៅឆ្នាំនេះ។
មិនតែប៉ុណ្ណោះ លោក ត្រាំ ក៏បានបង្ហាញក្តីរំពឹងទុកផងដែរថា លោក Stephens នឹងជួយរក្សានូវអ្វីដែលហៅថា ទំនាក់ទំនងពិសេសរវាងសហរដ្ឋអាមេរិក និងចក្រភពអង់គ្លេស ក្នុងការបង្កើនភាពជិតស្និទ្ធជាមួយគ្នាទាំងផ្នែកយោធា ចារកម្ម និងវប្បធម៌។
តួនាទីជាឯកអគ្គរដ្ឋទូតសហរដ្ឋអាមេរិកប្រចាំចក្រភពអង់គ្លេស គឺជាមុខតំណែងការទូតដែលគេប្រាថ្នាចង់បានបំផុត ខណ:ប្រធានាធិបតីលោក ត្រាំ បានសម្រេចផ្តល់តួនាទីនេះ ទៅឲ្យលោក Stephens ដែលត្រូវបានចាត់ទុកថាជាគាំទ្រដ៏លេចធ្លោបំផុតម្នាក់ ក្នុងអំឡុងយុទ្ធនាការបោះឆ្នោតរបស់ខ្លួន៕
ជម្រាបជូនផងដែរថា លោក ត្រាំ បានជ្រើសតាំងអ្នកគាំទ្រដ៏ស្មោះស្ម័គ្ររបស់ខ្លួនជាច្រើនរូបរួចមកហើយ សម្រាប់នៅក្នុងគណៈរដ្ឋមន្ត្រី និងមុខតំណែងការទូតជាន់ខ្ពស់របស់លោក។ កាលពីចុងសប្តាហ៍មុន លោក ត្រាំ ក៏បានប្រកាសតែងតាំងមហាសដ្ឋីអចលនទ្រព្យ លោក Charles Kushner ដែលត្រូវជាដន្លងរបស់ខ្លួន ឲ្យធ្វើជាឯកអគ្គរដ្ឋទូតប្រចាំប្រទេសបារាំង ផងដែរ៕
