តុលាការឧទ្ធរណ៍សហព័ន្ធអាមេរិក កាលពីចុងសប្តាហ៍មុន បានតម្កល់ច្បាប់ដែលតម្រូវឲ្យក្រុមហ៊ុន ByteDance មានមូលដ្ឋាននៅប្រទេសចិន ដកចេញកម្មវិធី TikTok របស់ខ្លួន នៅសហរដ្ឋអាមេរិកនៅត្រឹមដើមឆ្នាំក្រោយ ឬមួយត្រូវប្រឈមនឹងកាបិទចោលទាំងស្រុង។ នេះបើតាមការចុះផ្សាយពីសារព័ត៌មាន Reuters។
ជុំវិញការសម្រេចចិត្តនេះ ត្រូវបានចាត់ទុកថាជាជ័យជម្នះដ៏ធំមួយសម្រាប់តុលាការសហរដ្ឋអាមេរិក និងក្រុមហ៊ុនដែលជាគូប្រជែងរបស់កម្មវិធីបណ្តាញសង្គមគ្រប់គ្រងដោយចិន ដោយសារតែវានឹងដាក់សម្ពាធកាន់តែខ្លាំងចំពោះក្រុមហ៊ុនមេ ByteDance ដើម្បីលក់ចេញកម្មវិធីរបស់ខ្លួន។
មិនតែប៉ុណ្ណោះ ចំពោះការរក្សាច្បាប់នេះ បានបង្កើនឲ្យមានការរំពឹងទុកចំពោះលទ្ធភាពនៃការហាមឃាត់ដែលមិនធ្លាប់មានពីមុន ក្នុងរយៈពេលត្រឹមតែប្រាំមួយសប្តាហ៍បន្ទាប់ ទៅលើកម្មវិធីប្រព័ន្ធបណ្តាញសង្គមខ្នាតយក្សរបស់ចិនដែលត្រូវបានប្រើប្រាស់ដោយជនជាតិអាមេរិកក្នុងចំនួនប្រហែល ១៧០លាននាក់។
ប៉ុន្តែទោះជាយ៉ាងណាក៏ដោយ ជុំវិញសេចក្តីសម្រេចនេះ ត្រូវបានគេរំពឹងថា TikTok នឹងបន្តធ្វើការប្តឹងឧទ្ធរណ៍ទៅកាន់តុលាការកំពូល។
ដូចដែលបានដឹងស្រាប់ហើយថា យោងទៅតាមសេចក្តីសម្រេចកាលពីមុន ByteDance មានពេលរហូតដល់ថ្ងៃទី១៩ ខែមករា ដើម្បីលក់ ឬដកហូតទ្រព្យសម្បត្តិរបស់ TikTok នៅសហរដ្ឋអាមេរិក ឬមួយត្រូវប្រឈមនឹងការហាមឃាត់ទាំងស្រុង។
ទន្ទឹមនឹងនេះ ក្រសួងយុត្តិធម៌អាមេរិកបាននិយាយថា នៅក្រោមភាពជាម្ចាស់របស់ចិន TikTok បង្កការគំរាមកំហែងដោយសារតែការលួចចូលប្រើប្រាស់ទិន្នន័យផ្ទាល់ខ្លួនដ៏ច្រើនរបស់ជនជាតិអាមេរិក និងថែមទាំងបានអះអាងទៀតថា ប្រទេសចិន អាចក្លែងបន្លំព័ត៌មានរបស់ជនជាតិអាមេរិកយកប្រើប្រាស់ តាមរយៈកម្មវិធី TikTok ។
អគ្គមេធាវី លោក Merrick Garland បានហៅការសម្រេចចិត្តនេះថា ជាជំហានដ៏សំខាន់មួយក្នុងការរារាំងរដ្ឋាភិបាលចិន មិនឲ្យប្រើប្រាស់ TikTok ដើម្បីធ្វើជាអាវុធប្រឆាំងរដ្ឋាភិបាលរបស់សហរដ្ឋអាមេរិក។
ជម្រាបជូនថា សេចក្តីសម្រេចនេះ បានកើតឡើងចំពេលមានភាពតានតឹងពាណិជ្ជកម្មកាន់តែខ្លាំងឡើងរវាងប្រទេសដែលមានសេដ្ឋកិច្ចធំបំផុតរបស់ពិភពលោកទាំងពីរ បន្ទាប់ពីរដ្ឋបាលរបស់ប្រធានាធិបតី ចូ បៃដិន បានដាក់ការរឹតបន្តឹងថ្មីលើឧស្សាហកម្មបន្ទះឈីបរបស់ចិន ខណ:ពេលដែលរដ្ឋាភិបាលទីក្រុងប៉េកាំង បានឆ្លើយតបវិញ ជាមួយនឹងការដាក់បម្រាមទាំងស្រុងលើការនាំចេញរ៉ែសំខាន់ៗដែលប្រើប្រាស់ក្នុងឧស្សាហកម្មបន្ទះឈីបដូចជា ហ្គាលីញ៉ូម ហ្រ្គេនញ៉ូម និងអង់ទីម៉ូនី ទៅកាន់សហរដ្ឋអាមេរិក៕
