ធនាគារកណ្តាលចិន បន្តទិញមាសបម្រុងទុកឡើងវិញ បន្ទាប់ពីផ្អាកអស់រយ:ពេល ៦ខែ

ធនាគារកណ្តាលរបស់ប្រទេសចិន (PBOC) បានបង្ហាញឲ្យដឹងកាលពីពេលថ្មីៗនេះថា ខ្លួនបានចាប់ផ្តើមបន្តទិញមាសសម្រាប់ជាទុនបម្រុងទុកឡើងវិញ នៅក្នុងខែវិច្ឆិកា បន្ទាប់ពីការផ្អាករយ:ពេល ៦ខែ។ នេះបើតាមការចុះផ្សាយពីសារព័ត៌មាន Reuters។

ទិន្នន័យផ្លូវការដែលបានចេញផ្សាយដោយរដ្ឋាភិបាលចិនបានបង្ហាញថា ការកាន់កាប់មាសរបស់ PBOC គិតនៅត្រឹមចុងខែវិច្ឆិកា បានកើនឡើងដល់ ៧២,៩៦ លានអោនស៍ (២២៨០តោន) បើធៀបទៅនឹងខែតុលា ដែលមានចំនួន ៧២,៨០ លានអោនស៍ (២២៧៥តោន)។

ទោះជាយ៉ាងណាក៏ដោយ បើទោះបីជាចំនួនកើនឡើង ប៉ុន្តែតម្លៃនៃទុនបម្រុងមាសរបស់ប្រទេសចិន បានធ្លាក់ចុះមកនៅត្រឹម ១៩៣,៤ពាន់លានដុល្លារ កាលពីខែចុងខែមុន បើធៀបទៅនឹងតម្លៃ ១៩៩ពាន់លានដុល្លារ គិតត្រឹមចុងខែតុលា ដោយសារតែតម្លៃមាសសកលធ្លាក់ចុះ ចំពេលមានភាពមិនច្បាស់លាស់លើស្ថានភាពសេដ្ឋកិច្ច ក្រោយការឈ្នះឆ្នោតរបស់លោក ដូណាល់ ត្រាំ ក្នុងនាមជាប្រធានាធិបតីសហរដ្ឋអាមេរិកអាណត្តិថ្មី។

តម្លៃ​មាស Spot បាន​ធ្លាក់​ចុះ ៥% ចាប់​តាំង​ពីមានការកើន​ឡើង​ដល់​កម្រិត​ខ្ពស់​បំផុត​ ក្នុងចំនួន ២ ៧៩០ដុល្លារក្នុង​មួយ​អោន​ គិតនៅត្រឹមថ្ងៃ​ទី៣១ ខែ​តុលា ប៉ុន្តែ​ទោះជាយ៉ាងណា តម្លៃមាសនៅ​តែ​កើន​ឡើង ២៨% នៅ​ឆ្នាំ​នេះ។

លោក Ole Hansen ប្រធានផ្នែកយុទ្ធសាស្រ្តទំនិញនៅក្រុមហ៊ុន Saxo Bank បាននិយាយថា ការទិញចូលមាសសម្រាប់ទុកជាទុនបម្រុងឡើងវិញនេះ កំពុងបង្ហាញថា PBOC ចង់សម្របខ្លួនទៅនឹងកម្រិតតម្លៃដ៏ខ្ពស់ទាំងនេះ ហើយកំពុងត្រៀមខ្លួនរួចជាស្រេចដើម្បីកសាងទុនបម្រុងឡើងវិញ ដោយមិនខ្វល់ពីស្ថានភាពអ្វីទាំងអស់៕