Meta Platforms ដែលជាក្រុមហ៊ុនរបស់បណ្តាញសង្គម Facebook កាលពីពេលថ្មីៗនេះ បានបរិច្ចាគទឹកប្រាក់ចំនួន ១លានដុល្លារ ទៅកាន់មូលនិធិរបស់ប្រធានាធិបតីជាប់ឆ្នោតអាណត្តិថ្មី លោក ដូណាល់ ត្រាំ។ នេះបើតាមការចុះផ្សាយពីសារព័ត៌មាន Reuters។
យោងតាមការចុះផ្សាយពីសារកាសែត Wall Street Jouurnal បានបង្ហាញឲ្យដឹងទៀតថា ការបរិច្ចាគរបស់ក្រុមហ៊ុន Meta នេះ គឺត្រូវបានធ្វើឡើងជាលើកដំបូង ខណ:ពេលដែលក្រុមហ៊ុនបច្ចេកវិទ្យាខ្នាតយក្ស ចង់ផ្សះផ្សាទំនាក់ទំនងជាមួយលោក ត្រាំ ឡើងវិញ។
គួរឲ្យដឹងផងដែរថា មុនពេលមានការបរិច្ចាគនេះ នាយកប្រតិបត្តិរបស់ Meta លោក Mark Zuckerberg បានជួបជាមួយលោក ត្រាំ ក្នុងការទទួលទានអាហារពេលល្ងាចជាលក្ខណ:ឯកជាមួយ នៅ Mar-a-Lago កាលពីចុងខែវិច្ឆិកា ហើយត្រូវបានគេដឹងថានេះជាសកម្មភាពចុងក្រោយបំផុតមួយ ដែល Meta ចង់ង្កើតទំនាក់ទំនងវិជ្ជមានជាមួយប្រធានាធិបតីរូបនេះ ឡើងវិញ។
រំលឹកផងដែរថា លោក Mark បានបដិសេធមិនគាំទ្រទាំងលោក ដូណាល់ ត្រាំ ឬលោក ចូ បៃដិន សម្រាប់ការបោះឆ្នោតនៅឆ្នាំនេះ នៅអំឡុងបទសម្ភាសមួយតាមរយ:ប្រព័ន្ធផ្សព្វផ្សាយសង្គម ដែលបានកើតឡើងមុនពេលលោក បៃដិន លាលែងចេញពីតំណែងជាបេក្ខជនបក្សប្រជាធិបតេយ្យ ហើយត្រូវបានជំនួសវិញដោយលោកស្រី Kamala Harris ។
ជម្រាបជូនថា ទំនាក់ទំនងរវាងក្រុមហ៊ុន Meta និងលោក ត្រាំ បានធ្លាក់ចូលទៅក្នុងស្ថានភាពកាន់តែតានតឹងឡើង ពោលគឺចាប់ពីមានការបោះឆ្នោតប្រធានាធិបតីឆ្នាំ២០២០ មក អំឡុងពេលដែលក្រុមហ៊ុន Meta បានផ្អាកគណនី Facebook និង Instagram របស់ ត្រាំ ក្នុងរយ:ពេលប្រហែល ២ឆ្នាំពីវេទិការបស់ខ្លួន បន្ទាប់ពីមានការតវ៉ានៅក្នុងខែមករា ឆ្នាំ២០២១៕
