ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានប្រកាសកាលពីពេលថ្មីៗនេះថា លោកនឹងតែងតាំងមហាសេដ្ឋីលោក Tilman Fertitta ដែលជាម្ចាស់ក្រុមបាល់បោះ Houston Rockets ឲ្យឡើងធ្វើជាឯកអគ្គរដ្ឋទូតថ្មីប្រចាំប្រទេសអ៊ីតាលី។
លោក ត្រាំ បានសរសេរនៅលើបណ្តាញសង្គម Truth Social របស់ខ្លួន កាលពីថ្ងៃសៅរ៍ថា៖ “Tilman គឺជាអ្នកជំនួញដ៏ជោគជ័យម្នាក់ដែលបានបង្កើត និងសាងសង់ក្រុមហ៊ុនកម្សាន្ត និងអចលនទ្រព្យឈានមុខគេមួយរបស់ប្រទេសរបស់យើង ដោយគាត់បានជួយផ្តល់ការងារដល់ពលរដ្ឋអាមេរិកប្រហែល ៥ម៉ឺននាក់”។
លោកបន្ថែមទៀតថា ៖” “Tilman មានប្រវត្តិដ៏យូរលង់ក្នុងការផ្តល់ឲ្យសហគមន៍វិញតាមរយៈគំនិតផ្តួចផ្តើមសប្បុរសធម៌ជាច្រើន ដែលរួមមានទាំងអង្គការសប្បុរសធម៌របស់កុមារ ការអនុវត្តច្បាប់ និងសហគមន៍វេជ្ជសាស្ត្រជាដើម ហើយគាត់ស័ក្តិសមណាស់ ដើម្បីទទួលបានតំណែងក្នុងរដ្ឋបាលរបស់ខ្ញុំ”។
ជាម្រាបជូនផងដែរថា លោក Tilman Fertitta គឺជាប្រធាន និងជាម្ចាស់ក្រុមហ៊ុន Landry’s ដែលប្រតិបត្តិការលើអាជីវកម្មធំៗ រួមមានភោជនីយដ្ឋាន សណ្ឋាគារ និងកាស៊ីណូជាច្រើន នៅទូទាំងសហរដ្ឋអាមេរិក ខណ:បច្ចុប្បន្នទ្រព្យសម្បត្តិសរុបរបស់លោក ត្រូវបានប៉ាន់ប្រមាណថាមានចំនួនជាង ១០ពាន់លានដុល្លារ៕
