លោកស្រី Lara Trump កាលពីពេលថ្មីៗកន្លងទៅនេះ បានប្រកាសថាលោកស្រី បានសម្រេចចិត្តដកខ្លួនចេញពីបញ្ជីបេក្ខជនដើម្បីជំនួសតំណែងសមាជិកព្រឹទ្ធសភា លោក Marco Rubio ដែលនឹងត្រូវផុតអាណត្តិ។ នេះបើតាមការចុះផ្សាយពីសារព័ត៌មាន Reuters។
លោកស្រី Lara Trump ដែលត្រូវជាកូនប្រសារបស់ប្រធានាធិបតីជាប់ឆ្នោតអាណត្តិថ្មី លោក ដូណាល់ ត្រាំ បានបង្ហោះសារមួយនៅលើបណ្តាញសង្គម X ដោយនិយាយថាលោកស្រី បានសម្រេចដកខ្លួនចេញពីបញ្ជីឈ្មោះបេក្ខជន ដើម្បីជំនួសសមាជិកព្រឹទ្ធសភារដ្ឋ Florida លោក Marco Rubio បន្ទាប់ពីបានចំណាយពេលគិតជាយូរ ឆ្លុះបញ្ចាំងខ្លួនឯង និងត្រូវបានលើកទឹកចិត្តដោយមនុស្សជាច្រើន ។
មិនតែប៉ុណ្ណោះ ក្រោយការប្រកាសដកខ្លួនចេញនេះ លោកស្រី Lara បាននិយាយថាលោកស្រី នឹងមានអ្វីដែលត្រូវប្រកាសនៅខែក្រោយ ប៉ុន្តែមិនបានបញ្ជាក់លម្អិតជាងនេះនោះទេ ខណ:លោកស្រី ត្រូវបានគេយល់ឃើញថាអាចនឹងត្រូវចូលកាន់តំណែងធំណាមួយផ្សេងទៀត នៅក្នុងរដ្ឋបាលឪពុកក្មេងរបស់ខ្លួន។
កូនប្រសារបស់ប្រធានាធិបតីជាប់ឆ្នោតអាមេរិករូបនេះ បានបញ្ជាក់ថា នៅតែមានឆន្ទៈក្នុងការបម្រើប្រជាជន និងចង់មានឱកាសកាន់តែច្រើនផ្សេងទៀត នាពេលអនាគត។
ជម្រាបជូនថា Lara បានរៀបការជាមួយកូនប្រុសរបស់លោក ត្រាំ គឺលោក Eric Trump នៅចុងឆ្នាំ២០១៤ បន្ទាប់ពីបានទាក់ទងគ្នាអស់រយៈពេល ៦ឆ្នាំ និងមានកូនពីរនាក់ជាមួយគ្នា។ Lara បានចូលរួមចំណែកយ៉ាងច្រើនក្នុងយុទ្ធនាការបោះឆ្នោតរបស់ឪពុកក្មេកខ្លួន ខណ:អ្នកសង្កេតការណ៍ចាត់ទុកលោកស្រី Lara ជាស្ត្រីដែលមានមហិច្ឆតាខ្ពស់ក្នុងឆាកនយោបាយ៕
