ប្រធានាធិបតីជាប់ឆ្នោត លោក ដូណាល់ ត្រាំ បានជំរុញឲ្យតុលាការកំពូលរបស់សហរដ្ឋអាមេរិក ផ្អាកដំណើរការអនុម័តទៅលើច្បាប់បិទចោល ឬបង្ខំឲ្យលក់បណ្តាញសង្គម TikTok នៅអាមេរិក ដោយលើកឡើងថា គួរតែទុកពេលវេលាឲ្យរដ្ឋាភិបាលថ្មីរបស់លោក ជាអ្នករកដំណោះស្រាយ។ នេះបើតាមការចុះផ្សាយពីសារព័ត៌មាន CNA។
ទាំង TikTok និងក្រុមហ៊ុនមេរបស់ខ្លួន គឺ ByteDance កំពុងព្រយាមយ៉ាងខ្លាំងដើម្បីរក្សាកម្មវិធីកម្សាន្តដ៏ពេញនិយមនៅលើអ៊ីនធឺណិតរបស់ខ្លួនមួយនេះ នៅសហរដ្ឋអាមេរិក បន្ទាប់ពីសភាបានបោះឆ្នោតកាលពីខែមេសា ដើម្បីហាមឃាត់ TikTok លុះត្រាតែក្រុមហ៊ុនមេរបស់ចិនមួយនេះ យល់ព្រមលក់កម្មវិធីរបស់ខ្លួនត្រឹមថ្ងៃទី១៩ ខែមករា។
TikTok បានស្វែងរកឲ្យមានការកាត់បន្ថយច្បាប់ ហើយតុលាការកំពូលបានយល់ព្រមពន្យារពេលការបើកសវនាការលើករណីនេះ ខណ:តុលាការគ្រោងនឹងបើកសវនាការលើសំណុំរឿងនេះសារជាថ្មី នៅថ្ងៃទី១០ ខែមករាខាងមុខ។
ប៉ុន្តែប្រសិនបើតុលាការមិនសម្រេចតាមការពេញចិត្តរបស់ ByteDance ហើយមិនមានការដកខ្លួនចេញទេនោះ កម្មវិធីនេះអាចត្រូវបានហាមឃាត់យ៉ាងមានប្រសិទ្ធភាព នៅសហរដ្ឋអាមេរិក នៅត្រឹមថ្ងៃទី១៩ ខែមករា ពោលគឺមួយថ្ងៃមុនពេល លោក ត្រាំ ស្បថចូលកាន់តំណែង។
លោក Trump បាននិយាយនៅក្នុងឯកសារមួយកាលពីពេលថ្មីៗនេះ ថា ករណីនេះបង្ហាញពីភាពតានតឹងដែលមិនធ្លាប់មានពីមុនមក វាផ្តល់ភាពពិបាករវាងសិទ្ធិនិយាយដោយសេរីនៅម្ខាង និងគោលនយោបាយការបរទេស ក៏ដូចជាកង្វល់សន្តិសុខជាតិនៅម្ខាងទៀត។
ឯកសារនោះបានបន្ថែមថា ការផ្អាកច្បាប់នៃការបិទ TikTok នេះ នឹងផ្តល់ឱកាសយ៉ាងសំខាន់ដល់ប្រធានាធិបតីអាណត្តិថ្មី ដើម្បីបន្តស្វែងរកដំណោះស្រាយនយោបាយ ។
ជម្រាបជូនថា ការគាំទ្ររបស់លោក ត្រាំ សម្រាប់កម្មវិធី TikTok ហាក់ផ្ទុះស្រឡះកាលពីឆ្នាំ២០២០ នៅពេលដែលលោក បានព្យាយាមបិទកម្មវិធីនេះនៅក្នុងសហរដ្ឋអាមេរិក ហើយបង្ខំឲ្យលក់វាទៅឲ្យក្រុមហ៊ុនអាមេរិក ដោយសារតែភាពជាម្ចាស់របស់ប្រទេសចិន ដែលនាំឲ្យប៉ះពាល់ដល់សន្តិសុខជាតិរបស់សហរដ្ឋអាមេរិក៕
