រដ្ឋាភិបាលរបស់ប្រទេសអាល្លឺម៉ង បាននិយាយកាលពីថ្ងៃចន្ទកន្លងទៅថា មហាសេដ្ឋីបច្ចេកវិទ្យា លោក Elon Musk កំពុងព្យាយាមជ្រៀតជ្រែកចូលក្នុងការបោះឆ្នោតជាតិរបស់អាល្លឺម៉ង់ ដែលនឹងត្រូវធ្វើឡើងនៅខែកុម្ភ:ខាងមុខ តាមរយ:ការបង្ហាញជំហរគំាទ្រទៅលើបក្សស្តាំនិយម AfD។ នេះបើតាមការចុះផ្សាយពីសារព័ត៌មាន Politico។
គួរឲ្យដឹងផងដែរថា ការព្រមាននេះកើតឡើងមួយថ្ងៃប៉ុណ្ណោះ បន្ទាប់ពីនាយកប្រតិបត្តិក្រុមហ៊ុន Tesla រូបនេះ បានសរសេរអត្ថបទមួយ នៅក្នុងកាសែតអាល្លឺម៉ង់ Welt am Sonntag ដោយបង្ហាញការគាំទ្រទៅលើបក្សស្តាំនិយមជ្រុល (AfD) ថាជាក្តីសង្ឃឹមចុងក្រោយ សម្រាប់ប្រទេសនេះ។
ទន្ទឹមនឹងនេះ អ្នកនាំពាក្យរដ្ឋាភិបាលអាល្លឺម៉ង់ បាននិយាយប្រាប់អ្នកយកព័ត៌មានថា លោក Musk កំពុងព្យាយាមជះឥទ្ធិពលលើការបោះឆ្នោតសហព័ន្ធ តាមរយ:ការប្រើប្រាស់បណ្តាញសង្គមរបស់ខ្លួន។ បើទោះបីជាបានទទួលស្គាល់ចំពោះសិទ្ធិសេរីភាពក្នុងការបញ្ចេញមតិក៏ដោយ ប៉ុន្តែអ្នកនាំពាក្យរូបនេះ បាននិយាយថា ការលើកឡើងរបស់លោក Musk បែបនេះ គឺជារឿងមិនសមហេតុផលសោះឡើយ។
ជម្រាបជូនថា ការអត្ថាធិប្បាយរបស់លោក Musk បានបង្កឲ្យមានប្រតិកម្មពីសំណាក់អ្នកនយោបាយច្រើនរបស់អាល្លឺម៉ង់ ខណ:លោក Lars Klingbeil មេដឹកនាំគណបក្សសង្គមប្រជាធិបតេយ្យដែលកំពុងកាន់អំណាច ក៏បានប្រដូចមហាសេដ្ឋីអាមេរិករូបនេះ ទៅនឹងប្រធានាធិបតីរុស្ស៊ី លោក វ៉្លាឌីមៀ ពូទីន ផងដែរ។
លោកបានបន្ថែមថា ទាំងលោក ពូទីន និងលោក Musk ចង់ឃើញកងកម្លាំងប្រឆាំងលទ្ធិប្រជាធិបតេយ្យទទួលបានជោគជ័យក្នុងការបោះឆ្នោត ដែលបណ្តាលឲ្យប្រទេសអាឡឺម៉ង់ ធ្លាក់ចូលទៅក្នុងភាពវឹកវរ៕
