តុលាការរបស់ប្រទេសកូរ៉េខាងត្បូង នៅថ្ងៃអង្គារនេះ បានអនុញ្ញាតឲ្យចេញដីកាចាប់ខ្លួន ប្រធានាធិបតីដែលត្រូវបានព្យួរតំណែង លោក Yoon Suk Yeol ក្រោយចោទប្រកាន់ពីបទបះបោរ និងការរំលោភបំពានលើអំណាច បន្ទាប់ពីបានដាក់ចេញច្បាប់អាជ្ញាសឹកដ៏គួរឲ្យភ្ញាក់ផ្អើលមួយកាលពីពេលកន្លងទៅ។ នេះជាលើកទីមួយក្នុងប្រវត្តិសាស្រ្តហើយដែលមេដឹកនាំកំពុងកាន់អំណាច ត្រូវប្រឈមមុខនឹងដីកាចាប់ខ្លួនរបស់តុលាការបែបនេះ។ នេះបើតាមការចុះផ្សាយពីសារព័ត៌មាន UPI។
យោងតាមការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បានបង្ហាញឲ្យដឹងថា ដីកាចាប់ខ្លួនលោក Yoon ត្រូវតែអនុវត្តក្នុងរយៈពេលប្រាំពីរថ្ងៃ លុះត្រាតែមានការពន្យារពេលណាមួយបន្ថែមទៀត។ លោក Yoon ត្រូវបានគេរំពឹងថានឹងត្រូវឃុំខ្លួននៅមជ្ឈមណ្ឌលឃុំឃាំងក្រុងសេអ៊ូល។
ក្រុមស៊ើបអង្កេតរួមគ្នាមួយ ដោយរួមមានសមាជិកមកពីការិយាល័យប្រឆាំងអំពើពុករលួយរបស់ប៉ូលីស និងក្រសួងការពារជាតិ បានបញ្ជាឲ្យឃុំខ្លួន លោក Yoon បន្ទាប់ពីលោកមិនបានអើពើនឹងដីកាកោះពីមុនចំនួនបីលើករួចមកហើយ ដើម្បីចូលខ្លួនសាកសួរពាក់ព័ន្ធនឹងការប្រកាសចេញច្បាប់អាជ្ញាសឹក កាលពីថ្ងៃទី៣ ខែធ្នូកន្លងទៅ។
គួរឲ្យដឹងថា លោក Yoon នៅតែស្ថិតក្នុងតំណែងបន្ទាប់ពីត្រូវបានចោទប្រកាន់ដោយសមាជិកសភាក្នុងការប៉ុនប៉ងដកតំណែងជាលើកទីពីរ នៅថ្ងៃទី១៤ ខែធ្នូ ដោយរង់ចាំការសម្រេចចិត្តចុងក្រោយរបស់តុលាការធម្មនុញ្ញថាតើត្រូវបញ្ចប់តំណែងប្រធានាធិបតីរបស់លោក Yoon ឬមួយត្រូវស្តារតំណែងរបស់លោកឡើងវិញ ក្នុងរយៈពេល ១៨០ថ្ងៃទៀត។
ជម្រាបជូនថា បន្ទាប់ពីការចោទប្រកាន់ត្រូវបានអនុម័តក្នុងសំឡេងបោះឆ្នោត ២០៤ ទល់នឹង ៨៥ លោក Yoon ត្រូវបានជំនួសដោយនាយករដ្ឋមន្ត្រី Han Duck-soo ក្នុងនាមជាប្រធានាធិបតីស្តីទី។ ប៉ុន្តែក្រោយមក លោក Han ត្រូវបានដកចេញពីតំណែងវិញ កាលពីថ្ងៃសុក្រ និងត្រូវបានជំនួសដោយរដ្ឋមន្ត្រីហិរញ្ញវត្ថុ លោក Choi Sang-mok៕
