ប្រទេសរុស្ស៊ី កាលពីពេលថ្មីៗនេះ បានប្រកាសកាត់បន្ថយការផ្គត់ផ្គង់ឧស្ម័នរបស់ខ្លួន ទៅកាន់តំបន់អឺរ៉ុប តាមរយៈបំពង់បង្ហូរឆ្លងកាត់ប្រទេសអ៊ុយក្រែន ពោលគឺមុនពេលកិច្ចព្រមព្រៀងឆ្លងកាត់ជាមួយរដ្ឋាភិបាលទីក្រុងគៀវ ត្រូវផុតកំណត់។ នេះបើតាមការចុះផ្សាយពីសារព័ត៌មាន Reuters។
ក្រុមហ៊ុនថាមពលខ្នាតយក្សរបស់រុស្ស៊ី Gazprom បាននិយាយថា ខ្លួននឹងបញ្ជូនឧស្ម័នត្រឹមតែ ៣៧,២ លានម៉ែត្រគូប ទៅតំបន់អឺរ៉ុបតាមរយៈអ៊ុយក្រែន នៅថ្ងៃទី៣១ ខែធ្នូ ពោលគឺធ្លាក់ចុះពីចំនួន ៤២,៤ លានម៉ែត្រគូប កាលពីមួយថ្ងៃមុន។ ការបញ្ជូនឧស្ម័ននេះ ត្រូវបានគេរំពឹងថានឹងធ្លាក់ចុះដល់សូន្យ ចាប់ពីថ្ងៃទី១ ខែមករា ឆ្នាំ២០២៥ តទៅ ពោលគឺនៅពេលដែលកិច្ចព្រមព្រៀងឆ្លងកាត់រយៈពេលប្រាំឆ្នាំ ជាមួយអ៊ុយក្រែនត្រូវផុតកំណត់។
តាមរយ:បំពង់បង្ហូរនោះ រុស្ស៊ីនឹងបញ្ឈប់ទាំងស្រុងនូវការនាំចេញឧស្ម័ន ដោយឆ្លងកាត់តាមរយៈប្រទេសអ៊ុយក្រែនទៅកាន់អឺរ៉ុប ហើយបន្តហូរទៅកាន់ប្រទេសស្លូវ៉ាគី អូទ្រីស ហុងគ្រី និងអ៊ីតាលី ជាដើម។ អ៊ុយក្រែនបានបដិសេធមិនធ្វើការចរចាកិច្ចព្រមព្រៀងថ្មីជាមួយរុស្ស៊ីទេ ដោយសារការប្រយុទ្ធគ្នាកំពុងបន្តនៅឡើយ។
គួរឲ្យដឹងថា ការបញ្ឈប់ការដឹកជញ្ជូនឧស្ម័នរុស្ស៊ី ដោយឆ្លងកាត់អ៊ុយក្រែននេះ នឹងក្លាយជាបញ្ហាដ៏ធំមួយចំពោះប្រទេសម៉ុលដាវី ដែលទទួលបានឧស្ម័នពីរុស្ស៊ីច្រើនជាងគេ ក្នុងចំនួនប្រហែល ២ ពាន់លានម៉ែត្រគូបក្នុងមួយឆ្នាំ តាមរយៈបំពង់បង្ហូរនេះ។
ជម្រាបជូនថា ការបញ្ចប់កិច្ចព្រមព្រៀងឆ្លងកាត់នេះ មានន័យថា រដ្ឋាភិបាលក្រុងគៀវ នឹងបាត់បង់ថ្លៃសេវាពីរុស្ស៊ីប្រហែល ៨០០លានដុល្លារ ហើយក្រុមហ៊ុន Gazprom ក៏នឹងខាតបង់ទឹកប្រាក់ជិត ៥ពាន់លានដុល្លារផងដែរ ពីការលក់ហ្គាស់របស់ខ្លួនទៅអឺរ៉ុប តាមរយៈអ៊ុយក្រែន៕
