យោងតាមរដ្ឋមន្ត្រីក្រសួងថាមពល និងធនធានរ៉ែ លោក Bahlil Lahadalia បាននិយាយថា រដ្ឋាភិបាលឥណ្ឌូណេស៊ីកំពុងរៀបចំអនុវត្តកម្មវិធី ៥០% Biodiesel (B50) ជាកាតព្វកិច្ចចម្បង នៅឆ្នាំ២០២៦ ខាងមុខ ដើម្បីឈានដល់ការបញ្ឈប់ការនាំចូលប្រេងម៉ាស៊ូតទាំងស្រុង។ នេះបើតាមការចុះផ្សាយពីសារព័ត៌មាន VNA។
ជាផ្នែកមួយនៃកម្មវិធីផ្លាស់ប្តូរថាមពល រដ្ឋាភិបាលឥណ្ឌូណេស៊ី នឹងចាប់ផ្តើមអនុវត្តកម្មវិធី B40 ជាកាតព្វកិច្ចចម្បងនៅឆ្នាំនេះ មុនពេលបន្តរៀបចំកម្មវិធី B50 នៅឆ្នាំក្រោយ។ លោក Bahlil បានសង្កត់ធ្ងន់ទៀតថា កម្មវិធី B50 គឺស្របតាមការណែនាំរបស់ប្រធានាធិបតី លោក Prabowo Subianto ដើម្បីសម្រេចបាននូវសន្តិសុខថាមពលជាតិ។
ការអនុវត្តកម្មវិធី B50 ត្រូវបានគេរំពឹងទុកថានឹងបង្កើនទុនបម្រុងថាមពលរបស់ឥណ្ឌូណេស៊ី និងគាំទ្រដល់គោលដៅបង្កើនសមត្ថភាពរបស់ខ្លួនក្នុងការបំពេញតម្រូវការថាមពលក្នុងស្រុក និងកាត់បន្ថយការនាំចូល។
ជម្រាបជូនផងដែរថា B40 គឺជាកម្មវិធីផលិតថាមពល ដោយផ្សំចេញពីល្បាយនៃប្រេងម៉ាស៊ូត ៦០% និងជីវឥន្ធនៈ ៤០% ដែលផលិតចេញពីប្រេងដូង។
ទន្ទឹមនឹងនេះ អនុរដ្ឋមន្ត្រីអនុរដ្ឋមន្ត្រីក្រសួងវិនិយោគថ្មី លោក Yuliot Tanjung បានបញ្ជាក់បន្ថែមថា គោលនយោបាយនៃការប្រើប្រាស់ចំហេះ B40 ជាកាតព្វកិច្ច នឹងត្រូវបានអនុវត្តយ៉ាងពេញលេញ នៅក្នុងខែកុម្ភៈឆ្នាំនេះ។ លោកបានបន្ថែមថា ដំណាក់កាលដំបូងនៃកម្មវិធី B40 ត្រូវបានគេរំពឹងថានឹងផលិតបាន ១៥,៦ លានគីឡូលីត្រនៃប្រេងជីវសាស្រ្ត (Biodiesel) ដោយការផលិតនឹងនៅតែបន្តជាដំណាក់កាល ក្នុងរយ:ពេលពេញមួយឆ្នាំ៕
