នៅក្នុងវិស័យចម្រៀង តារារ៉េប ឬត្រូវគេស្គាល់ថាជា Rapper អាចផ្តល់នូវប្រាក់ចំណូលបានយ៉ាងច្រើន តាមរយ:ភាពល្បីល្បាញ បទចម្រៀង និងទេពកោសល្យតាំងតែពីកំណើតរបស់ពួកគេ។ ដូច្នេះហើយយើងសង្កេតឃើញថា ពួកគេតែងបង្ហាញពីភាពស៊ីវិល័យរបស់ខ្លួន តាមរយ:ការជិះរថយន្តទំនើប ពាក់គ្រឿងអលង្ការថ្លៃៗ សម្ភារ:ប្រើប្រាស់ប្រណីតៗ ជាដើម។
ទន្ទឹមនឹងនេះ យោងតាមការចុះផ្សាយពីសារព័ត៌មាន Discovered បានបង្ហាញពីបញ្ជីឈ្មោះកំពូលតារារ៉េបជំនាន់បច្ចុប្បន្នទាំង ៥រូប ដែលកើបប្រាក់ចំណូលបានច្រើនបំផុត ក្នុងរយ:ពេលប៉ុន្មានឆ្នាំចុងក្រោយនេះ៖
១. Drake
Aubrey Drake Graham ឬស្គាល់ជាទូទៅថា Drake គឺជាសិល្បករដ៏ល្បីល្បាញបំផុតមួយក្នុងពិភពលោក ដោយបទចម្រៀងរបស់គេ ទទួលបានការគាំទ្រយ៉ាងច្រើនលើសលប់ពីអ្នកស្តាប់ ពោលគឺលើសពី ៧៥ពាន់លានដង លើប្រព័ន្ធស្ទ្រីម Spotify ហើយគេក៏ជាសិល្បករដំបូងគេក្នុងប្រវត្តិសាស្ត្រផងដែរ ដែលអាចធ្វើបានដូច្នេះ។ បច្ចុប្បន្នតារារ៉េបវ័យ ៣៨ឆ្នាំរូបនេះ ត្រូវបានគេប៉ាន់ប្រមាណាថាមានទ្រព្យសម្បត្តិសរុបចំនួន ២៥០លានដុល្លារ។
២. Kendrick Lamar
នៅក្នុងជំនាន់ថ្មីៗនេះ Kendrick Lamar អាចត្រូវបានចាត់ទុកថាជាកំពូលរ៉េបដ៏ល្បីល្បាញបំផុតមួយរបស់ពិភពលោក ហើយបើក្រឡេកទៅមើលទ្រព្យសម្បត្តិវិញ បុរសវ័យ ៣៧ឆ្នាំរូបនេះ ត្រូវបានគេរាយការណ៍ថាមានចំនួនប្រមាណ ៧៥លានដុល្លារ។ នៅក្នុងវិស័យចម្រៀង Kendrick មិនត្រឹមតែបានជាប់ចំណាត់ថ្នាក់កំពូលនៅក្នុងតារាង Billboard ប៉ុណ្ណោះទេ ប៉ុន្តែរូបគេថែមទាំងធ្លាប់បានឈ្នះពានរង្វាន់ Grammy ផងដែរ។
៣.Travis Scott
ជាមួយនឹងទ្រព្យសម្បត្តិដ៏ច្រើនសន្ធឹកសន្ធាប់ប្រហែល ៧០លានដុល្លារ Travis Scott អាចចាត់ទុកថាជាតារារ៉េបដែលមានជាងគេបំផុត នាពេលបច្ចុប្បន្ននេះ។ ក្រៅតែវិស័យចម្រៀងរ៉េប Travis ក៏ធ្លាប់បានបង្ហាញខ្លួនជាច្រើននៅលើបុស្តិ៍ទូរទស្សន៍ រួមទាំងការចាប់ដៃសហការគ្នាជាមួយក្រុមហ៊ុន Nike លើការផលិតស្បែកជើង Jordan ផ្ទាល់ខ្លួន ខណ:ក្រុមហ៊ុន Netflix ក៏បានថតខ្សែភាពយន្តឯកសារពីរូបគេផងដែរ។
៤. Soulja Boy
Soulja Boy ដែលមានឈ្មោះពិតថា DeAndre Cortez Way គឺជាតារារ៉េបវ័យក្មេងបំផុតម្នាក់ដែលមានទ្រព្យសម្បត្តិយ៉ាងច្រើន។ នៅអាយុត្រឹមតែ ៣៤ឆ្នាំ តារារ៉េបរូបនេះ មានទ្រព្យសម្បត្តិសរុបប្រហែល ៣៥លានដុល្លារ ដោយសារតែបទចម្រៀងទទួលបានភាពល្បីល្បាញខ្លាំង និងស្ទីលរ៉េបប្លែកៗរបស់គេ។ ជាងនេះទៅទៀត Soulja Boy ក៏មានការបណ្តាក់ទុននៅក្នុងក្រុមហ៊ុនម៉ូដសម្លៀកបំពាក់ផ្ទាល់ខ្លួន និងមានអាជីពសម្តែងយ៉ាងសកម្មផងដែរ។
៥. Lil Uzi Vert
តារារ៉េបវ័យ ២៩ឆ្នាំ Lil Uzi Vert អាចរាប់ថាជាតារារ៉េបដែលរកបានចំណូលខ្ពស់បំផុតមួយ នាពេលបច្ចុប្បន្ននេះ ខណ:ទ្រព្យសម្បត្តិសរុបរបស់គេ ត្រូវបានប៉ាន់ប្រមាណថាមានចំនួន ៣០លានដុល្លារ។ យោងតាមទិន្នន័យពី XO Tour Lif3, Lil Uzi អាចរកចំណូលបានខ្ពស់បំផុតដល់ទៅ ២០លានដុល្លារ នៅចន្លោះខែកញ្ញា ឆ្នាំ២០១៧ ដល់ខែកញ្ញា ឆ្នាំ២០១៨។ ក្នុងពេលជាមួយគ្នានោះ បទចម្រៀងរបស់ Uzi Vert មានអ្នកចូលមើលចំនួន ៣,៥ពាន់លានដង និងមានកម្មវិធីចាក់ផ្សាយផ្ទាល់ដល់ទៅ ៧៦ នៅទូទាំងពិភពលោក៕
