ក្រុមហ៊ុនអចលនទ្រព្យ និងអភិវឌ្ឍន៍លំដាប់កំពូល DAMAC ដែលមានមូលដ្ឋាននៅទីក្រុងឌុយបៃ កាលពីពេលថ្មីៗនេះ បានសន្យាថានឹងបោះទុនវិនិយោគទឹកប្រាក់ចំនួន ២០ពាន់លានដុល្លារ ក្នុងការសាងសង់មជ្ឈមណ្ឌលទិន្នន័យថ្មីមួយ ក្នុងទឹកដីសហរដ្ឋអាមេរិក។ នេះបើតាមការចុះផ្សាយពីសារព័ត៌មាន Reuters។
ជុំវិញគម្រោងដ៏ធំនេះ ត្រូវបានធ្វើងឡើង បន្ទាប់ពីស្ថាបនិកក្រុមហ៊ុន DAMAC គឺមហាសេដ្ឋី Hussain Sajwani បានជួបពិភាក្សាគ្នាដោយផ្ទាល់ជាមួយប្រធានាធិបតីជាប់ឆ្នោតអាមេរិក លោក ដូណាល់ ត្រាំ នៅឯគេហដ្ឋាន Mar-a-Lago ក្នុងរដ្ឋ Florida ។
គួរឲ្យដឹងផងដែរថា ក្រុមហ៊ុនខ្នាតយក្សរបស់អារ៉ាប់រួមនេះ មានទំនាក់ទំនងយ៉ាងជិតស្និទ្ធជាមួយលោក ត្រាំ ជាយូរមកហើយ តាមរយៈភាពជាម្ចាស់នៃទីលានវាយកូនហ្គោលក្រោមម៉ាកយីហោ Trump តែមួយគត់របស់តំបន់មជ្ឈិមបូព៌ា នៅទីក្រុងឌុយបៃ។
យ៉ាងណាមិញ ដោយថ្លែងនៅឯគេហដ្ឋាន Mar-a-Lago លោក Sajwani បានប្រាប់អ្នកយកព័ត៌មានថា ៖”យើងគ្រោងនឹងបោះទុនវិនិយោគ ២០ពាន់លានដុល្លារ សម្រាប់មជ្ឈមណ្ឌលផ្ទុកទិន្នន័យនៅក្នុងទឹកដីអាមេរិក ហើយនឹងបន្តបោះទុនលើសពីនេះទៀត ប្រសិនបើយើងទទួលបានការឱកាសកាន់តែច្រើន នៅក្នុងទីផ្សារដ៏ធំនេះ”។
ទន្ទឹមនឹងនេះ យោងតាមលោក ត្រាំ បានបង្ហាញឲ្យដឹងផងដែរថា គម្រោងវិនិយោគមជ្ឈមណ្ឌលផ្ទុកទិន្នន័យថ្មីនេះ គឺស្ថិតនៅក្នុងដំណាក់កាលទីមួយ ដែលគ្រោងធ្វើឡើងនៅរដ្ឋតិចសាស់ អារីហ្សូណា អូក្លាហូម៉ា ល្វីស៊ីយ៉ាណា អូហៃអូ អ៊ីលីណយ មីឈីហ្គែន និងរដ្ឋ Indiana ។
ជម្រាបជូនផងដែរថា តម្រូវការមជ្ឈមណ្ឌលទិន្នន័យរបស់សហរដ្ឋអាមេរិក បានកើនឡើងយ៉ាងឆាប់រហ័ស ពោលគឺចាប់តាំងពីការបើកដំណើរការជាសាធារណៈនូវបច្ចេកវិទ្យាបញ្ញាសិប្បនិមិត្ត ChatGPT របស់ក្រុមហ៊ុន OpenAI កាលពីចុងឆ្នាំ២០២២ មក៕
