នាយកប្រតិបត្តិក្រុមហ៊ុន Microsoft លោក Satya Nadella បានប្រកាសកាលពីថ្ងៃ៧ ខែមករាកន្លងទៅថា ក្រុមហ៊ុនរបស់ខ្លួនគ្រោងនឹងវិនិយោគទឹកប្រាក់ចំនួន ៣ពាន់លានដុល្លារ នៅក្នុងប្រទេសឥណ្ឌា លើបច្ចេកវិទ្យាបញ្ញាសិប្បនិម្មិត (AI) និងហេដ្ឋារចនាសម្ព័ន្ធ Cloud ក្នុងរយៈពេលពីរឆ្នាំខាងមុខ។ នេះបើតាមការចុះផ្សាយពីសារព័ត៌មាន AFP។
ឥណ្ឌា ដែលជាប្រទេសមានប្រជាជនច្រើនជាងគេបំផុតលើពិភពលោក បានក្លាយទៅជាទីតាំងប្រកួតប្រជែងបច្ចេកវិទ្យា AI ដ៏សំខាន់មួយ ក្នុងរយៈពេលប៉ុន្មានឆ្នាំចុងក្រោយនេះ ខណៈពេលដែលក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាមេរិកជាច្រើន ស្វែងរកអ្នកប្រើប្រាស់ថ្មី សម្រាប់សេវាកម្មរបស់ពួកគេ និងចូលទៅទីផ្សារដែលសម្បូរទៅដោយធនធាន និងទេពកោសល្យ។
ទន្ទឹមនឹងនេះ លោក Nadella បាននិយាយថាផែនការវិនិយោគ ៣ពាន់លានដុល្លារនៅក្នុងប្រទេសឥណ្ឌានេះ នឹងរួមបញ្ចូលការបង្កើតមជ្ឈមណ្ឌលទិន្នន័យថ្មីៗនៅទីនោះផងដែរ។
លោក Nadella បានសង្កត់ធ្ងន់ទៀតថា ឥណ្ឌាកំពុងក្លាយជាអ្នកដឹកនាំយ៉ាងឆាប់រហ័សក្នុងការច្នៃប្រឌិត AI ជាមួយនឹងបើកឱកាសថ្មីៗជាច្រើននៅទូទាំងប្រទេស។
“ការវិនិយោគលើហេដ្ឋារចនាសម្ព័ន្ធ និងជំនាញដែលយើងកំពុងប្រកាសនៅថ្ងៃនេះ បញ្ជាក់ពីការប្តេជ្ញាចិត្តរបស់យើងក្នុងការធ្វើឲ្យប្រទេសឥណ្ឌាក្លាយជាបជ្ឈមណ្ឌល AI ជាលើកដំបូង ហើយនឹងជួយធានាឲ្យប្រជាជន និងអង្គការនានាទូទាំងប្រទេស ទទួលបានអត្ថប្រយោជន៍យ៉ាងទូលំទូលាយ”។ នេះបើតាមការបញ្ជាក់បន្ថែមរបស់លោក Nadella ។
ជម្រាបជូនផងដែរថា ការប្រកាសនេះបានកើតឡើងតិចជាងមួយសប្តាហ៍ប៉ុណ្ណោះ បន្ទាប់ពីប្រធានក្រុមហ៊ុន Microsoft លោក Brad Smith បាននិយាយថាក្រុមហ៊ុនរបស់ខ្លួន កំពុងបោះទុនលើការវិនិយោគទឹកប្រាក់ចំនួន ៨០ពាន់លានដុល្លារ ក្នុងបច្ចេកវិទ្យា AI នៅឆ្នាំសារពើពន្ធនេះ៕
