យោងតាមប្រភពជិតស្និទ្ធមួយបង្ហើបឲ្យដឹងថា លោក ដូណាល់ ត្រាំ គ្រោងនឹងចុះហត្ថលេខាលើបទបញ្ជាប្រតិបត្តិច្រើនជាង ៥០ នៅថ្ងៃដំបូងនៃការចូលកាន់តំណែងផ្លូវការក្នុងនាមជាប្រធានាធិបតីអាមេរិកទី៤៧។ នេះបើតាមការចុះផ្សាយពីសារព័ត៌មាន NBC។
គួរឲ្យដឹងថា លោក ត្រាំ នឹងត្រូវស្បថចូលកាន់តំណែងជាប្រធានាធិបតីអាមេរិកផ្លូវការ នៅថ្ងៃទី២០ ខែមករានេះ ដោយមានបំណងចុះហត្ថលេខាលើបទបញ្ជាជាច្រើន នៅចំពោះមុខហ្វូងអ្នកគាំទ្រនៅឯ នៅទីលាន Capital One Arena ក្នុងទីក្រុងវ៉ាស៊ីនតោន។ ប៉ុន្តែអ្វីដែលខុសពីការរំពឹងទុកគឺថា ពិធីនេះនឹងត្រូវធ្វើឡើងនៅខាងក្នុងវិមាន Capitol វិញ ដោយសារតែអាកាសធាតុមិនអំណោយផល។
យ៉ាងណាមិញ ថ្វីដ្បិតតែមិនទាន់បានបង្ហើបប្រាប់ទាំងអស់ តែក្នុងការជួបជុំអ្នកគាំទ្រមុនពេលស្បថចូលកាន់តំណែង កាលពីថ្ងៃអាទិត្យ លោក ត្រាំ ប្រកាសថា នៅពេលលោកបានអំណាចភ្លាម លោននឹងចុះហត្ថលេខាលើបទបញ្ជាមួយចំនួន រួមទាំងការផ្អាកជាបណ្តោះអាសន្នលើការហាមឃាត់កម្មវិធី TikTok ,វិធានការពង្រឹងសន្តិសុខព្រំដែន ,បញ្ឈប់អាណត្តិភាពចម្រុះនៅក្នុងរដ្ឋាភិបាលសហព័ន្ធ រួមទាំងកិច្ចការជាច្រើនដែលទាក់ទងនឹងគោលនយោបាយថាមពល និងលុបបំបាត់គោលនយោបាយសមធម៌ពីយោធាអាមេរិក ផងដែរ។
ទន្ទឹមនឹងនេះ គេរំពឹងទុកទៀតថា នៅមានបញ្ជាប្រតិបត្តិជាច្រើនទៀត ពោលគឺមិនក្រោម ១០០ទេ ដែលលោកត្រាំ គ្រោងនឹងចុះហត្ថលេខានៅថ្ងៃដំបូងក្នុងនាមជាប្រធានាធិបតីអាមេរិកផ្លូវការ ស្របពេលលោកក៏ប្រាប់ទៅអ្នកគាំទ្រផងដែរថា គ្រប់គ្នានឹងសប្បាយចិត្តចំពោះបញ្ជាប្រតិបត្តិទាំងនេះ។
ជម្រាបជូនផងដែរថា កាលពីអំឡុងពេលធ្វើជាប្រធានាធិបតី លោក ចូ បៃដិន បានចុះហត្ថលេខាលើបទបញ្ជាប្រតិបត្តិសរុបចំនួន ២២ ក្នុងអំឡុងពេលសប្តាហ៍ដំបូងនៃការចូលកាន់តំណែងរបស់ខ្លួន ដែលជាកំណត់ត្រាដ៏ច្រើនមួយនាពេលនោះ៕
