ប្រធានាធិបតីអាមេរិក លោក ដូណាល់ ត្រាំ កាលពីពេលថ្មីៗនេះ កំពុងស្ថិតនៅក្នុងការពិចារណាដើម្បីដាក់ពន្ធនាំចូល ១០% ទៅលើទំនិញរបស់ប្រទេសចិន ចាប់ពីដើមខែក្រោយតទៅ ពោលគឺនៅចំពេលដូចគ្នាដែលអាមេរិក នឹងត្រូវដាក់ពន្ធលើទំនិញរបស់កាណាដា និងម៉ិកស៊ិកដែរ។ នេះបើតាមការចុះផ្សាយពីសារព័ត៌មាន Reuters។
យ៉ាងណាមិញ ដោយបានថ្លែងប្រាប់ក្នុងកម្មវិធីមួយនៅឯសេតវិមានកាលពីថ្ងៃទី២១ ខែមករាកន្លងទៅ លោក ត្រាំ បានបញ្ជាក់ថា៖ “យើងកំពុងនិយាយអំពីការយកពន្ធ ១០% លើប្រទេសចិនដោយផ្អែកលើការពិតដែលថា ពួកគេកំពុងបញ្ជូនសារធាតុញៀនហ្វេនតានីល (fentanyl) ទៅកាន់ប្រទេសម៉ិកស៊ិកនិងកាណាដា។ ហើយផែនការពន្ធថ្មីនេះ អាចចូលជាធរមាននៅថ្ងៃទី១ ខែកុម្ភៈខាងមុខ”។
គួរឲ្យដឹងផងដែរថា ជុំវិញការគំរាមកំហែងនេះ ត្រូវបានធ្វើឡើងត្រឹមតែមួយថ្ងៃប៉ុណ្ណោះ បន្ទាប់ពីការស្បថចូលកាន់តំណែងដំបូងរបស់លោក ត្រាំ ខណ: វិធានការពន្ធថ្មីនេះ អាចនឹងចាប់ផ្ដើមនៅថ្ងៃទី ១ ខែកុម្ភៈ ពោលគឺជាកាលបរិច្ឆេទដូចគ្នាដែលលោកនឹងត្រូវអនុវត្តចំពោះពន្ធលើម៉ិកស៊ិក និងកាណាដា ជុំវិញបញ្ហាអន្តោប្រវេសន៍ខុសច្បាប់ និងលំហូរសារធាតុញៀនហ្វេនតានីល។
ទន្ទឹមនេះ លោក ត្រាំ បានមានប្រសាសន៍ទៀតថា៖ “ប្រទេសផ្សេងទៀតក៏ជាអ្នកបំពានដ៏ធំផងដែរ។ អ្នកដឹងទេថា វាមិនមែនត្រឹមតែប្រទេសចិនទេ”។ លោកបានបន្ថែមទៀតថា៖ “យើងមានឱនភាព ៣៥០ពាន់លានដុល្លារជាមួយសហភាពអឺរ៉ុប។ ពួកគេធ្វើបាបយើងយ៉ាងអាក្រក់ជាទីបំផុត ដូច្នេះពួកគេនឹងចូលទៅក្នុងការដកហូតពន្ធគយដូចគ្នា”។
រម្លឹកផងដែរថា ក្នុងថ្ងៃស្បថចូលកាន់តំណែង លោក ត្រាំ បានចោទប្រកាន់ប្លុកអឺរ៉ុបថា មិនបាននាំចូលផលិតផលអាមេរិកឲ្យបានគ្រប់គ្រាន់នោះទេ ហើយលោកនឹងកែតម្រូវចំពោះបញ្ហានេះ ដោយការដាក់ពន្ធបន្ថែម ឬដោយការជំរុញឲ្យសហភាពអឺរ៉ុប ទិញចូលប្រេង និងឧស្ម័នរបស់អាមេរិកបន្ថែមទៀត៕
