ក្រសួងយុត្តិធម៌អាមេរិក ត្រូវបានគេរាយការណ៍ថា នឹងបណ្តេញមន្ត្រីរបស់ខ្លួនជាច្រើននាក់ ដែលធ្លាប់ចូលរួមក្នុងការស៊ើបអង្កេតទៅលើសំណុំរឿងព្រហ្មទណ្ឌប្រឆាំងទៅនឹងប្រធានាធាបតីលោក ដូណាល់ ត្រាំ។ នេះបើតាមការចុះផ្សាយពីសារព័ត៌មាន NRP។
នៅក្នុងលិខិតបញ្ចប់តំណែងនោះ អគ្គមេធាវីស្តីទី លោក James McHenry បានសរសេរថា លោកមិនជឿឡើយថាមន្ត្រីទាំងនោះអាចទុកចិត្តទៀតបាន ក្នុងការបម្រើការងារក្រោមការដឹកនាំរបស់លោក ត្រាំ ដោយស្មោះត្រង់នោះ ដោយសារតែពួកគេធ្លាប់បានចូលរួមនៅក្នុងការកាត់ទោសប្រធានាធិបតីរូបនេះរួចទៅហើយ។
យ៉ាងណាមិញ ទោះបីជាលោក McHenry មិនបានបញ្ជាក់ថាមានមន្ត្រីប៉ុន្មាននាក់ដែលត្រូវបានបញ្ឈប់ពីការងារក៏ដោយ ប៉ុន្តែយោងតាមប្រព័ន្ធផ្សព្វផ្សាយរបស់សហរដ្ឋអាមេរិកជាច្រើន បានរាយការណ៍ថាមន្ត្រីមិនតិចជាង ១០ នាក់នោះទេដែលនឹងត្រូវដកហូតពីតំណែង រួមទាំងព្រះរាជអាជ្ញាអាជីពរបស់ក្រសួងយុត្តិធម៌ជាច្រើននាក់ ផងដែរ។
ទន្ទឹមនឹងនេះ គេដឹងថា ក្នុងចំណោមនោះ មន្ត្រីដែលលេចធ្លោជាងគេមួយរូប គឺរដ្ឋអាជ្ញាពិសេស Jack Smith ដែលធ្លាប់ធ្វើការនៅក្រោមការដឹកនាំរបស់ប្រធានាធិបតីអាណត្តិមុន លោក ចូ បៃដិន។ លោក Smith បានដាក់ពាក្យបណ្តឹងសហព័ន្ធចំនួនពីរប្រឆាំងនឹងលោក ត្រាំ ដោយមួយចោទប្រកាន់ពីការគ្រប់គ្រងមិនត្រឹមត្រូវនូវទិន្នន័យសម្ងាត់បន្ទាប់ពីចាកចេញពីសេតវិមាន និងមួយករណីទៀត ពាក់ព័ន្ធនឹងការសមគំនិតដើម្បីផ្លាស់ប្តូរលទ្ធផលបោះឆ្នោតឆ្នាំ២០២០។
ជម្រាបជូនផងដែរថា ការបណ្ដេញមន្ត្រីទាំងនេះចេញពីតំណែង មិនមែនជារឿងគួរឲ្យភ្ញាក់ផ្អើលទេ ពីព្រោះថាលោក ត្រាំ ធ្លាប់បានគំរាមតាំងពីដំបូងមកម្លេះ អំឡុងធ្វើយុទ្ធនាការឃោសនាបោះឆ្នោត ដោយនិយាយថាលោកនឹងបណ្ដេញលោក Smith ចេញពីតំណែងមុនគេ រួមទាំងមន្ត្រីផ្សេងទៀតដែលបានចូលរួម ក្នុងការស៊ើបអង្កេតលើរូបលោកផងដែរ ប្រសិនបើលោកជាប់ឆ្នោតឆ្នោតក្លាយជាប្រធានាធិបតីអាណត្តិថ្មី៕
