ក្រុមហ៊ុន Meta Platforms ដែលត្រូវបានគេស្គាល់ថាជាក្រុមហ៊ុនមេរបស់បណ្តាញសង្គមខ្នាតយក្ស Facebook និង Instagram បានឲ្យដឹងកាលពីពេលថ្មីៗកន្លងទៅថា ខ្លួនបានយល់ព្រមបង់ប្រាក់សំណងប្រហែល ២៥លានដុល្លារដើម្បីដោះស្រាយបណ្តឹងរបស់ប្រធានាធិបតី លោក ដូណាល់ ត្រាំ ជុំវិញការព្យួរគណនីបណ្តាញសង្គមទាំងពីររបស់លោក ក្នុងអំឡុងឆ្នាំ២០២១ កន្លងទៅ។ នេះបើតាមការចុះផ្សាយពីសារព័ត៌មាន Reuters។
គួរឲ្យដឹងថា គណនីបណ្តាញសង្គម Facebook និង Instagram របស់លោក ត្រាំ ត្រូវបានបិទភ្លាមៗ ក្រោយកើតព្រឹត្តិការណ៍កុបកម្មនៅវិមានសភា The Capitol របស់សហរដ្ឋអាមេរិក នៅឆ្នាំ២០២១ បន្ទាប់ពីលោកបានអះអាងថាការបរាជ័យក្នុងការបោះឆ្នោតរបស់ខ្លួន ទល់នឹងអតីតប្រធានាធិបតី ចូ បៃដិន នាពេលនោះ ត្រូវបានគេលួចបន្លំ។
យ៉ាងណាក៏ដោយ លោក ត្រាំ បានដាក់ពាក្យបណ្តឹងប្រឆាំងនឹងទៅនឹងបណ្តាញសង្គម Twitter ដែលឥឡូវនេះត្រូវបានគេស្គាល់ថាជា X រួមទាំងក្រុមហ៊ុន Facebook និង Alphabet (Google) ក៏ដូចជានាយកប្រតិបត្តិរបស់ពួកគេផងដែរ ក្នុងអំឡុងខែកក្កដា ឆ្នាំ២០២១ ដោយចោទប្រកាន់ថាពួកគេបានបំបិទទស្សនៈបែបអភិរក្ស ដោយខុសច្បាប់។
ទន្ទឹមនឹងនេះ ស្របពេល លោក ត្រាំ ទើបតែចូលកាន់តំណែងជាប្រធានាធិបតីនៅអាណត្តិទីពីរ ក្រុមហ៊ុន Meta ដែលជាក្រុមហ៊ុនមេរបស់បណ្តាញសង្គម Facebook និង Instagram បានសម្រេចផ្តល់សំណង ២៥លានដុល្លារ ដើម្បីបញ្ចប់សំណុំរឿងទាំងនោះវិញ តាមរយ:សេចក្តីជូនដំណឹងរបស់ក្រុមហ៊ុន Meta ដែលបានដាក់ទៅកាន់តុលារការសហព័ន្ធនៅ San Francisco។
ជម្រាបជូនផងដែរថា ក្នុងចំណោមសំណងដែលត្រូវបង់ ២៤លានដុល្លារនោះ ទឹកប្រាក់ចំនួន ២២លានដុល្លារ នឹងត្រូវផ្ទេរទៅកាន់មូលនិធិសម្រាប់បណ្ណាល័យប្រធានាធិបតីរបស់លោក ត្រាំ ហើយនៅសេសសល់នឹងត្រូវផ្តល់សម្រាប់ថ្លៃសេវាផ្លូវច្បាប់ និងដើមបណ្តឹងផ្សេងទៀត ក្នុងសំណុំរឿងនេះ៕
