តុលាការមួយរបស់ប្រទេសថៃ កាលពីពេលថ្មីៗនេះ បានបញ្ជាក់ថានឹងផ្តល់ការអនុញ្ញាតឲ្យអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា អាចធ្វើដំណើរចាកចេញទៅក្រៅប្រទេសបាន ដែលនេះត្រូវបានចាត់ទុកថាជាករណីលើកលែងដ៏កម្របំផុតមួយសម្រាប់ចុងចោទដែលកំពុងប្រឈមមុខនឹងការចោទប្រកាន់ពីបទប្រមាថព្រះមហាក្សត្រ។ នេះបើតាមការចុះផ្សាយពីសារព័ត៌មាន AFP។
មហាសេដ្ឋីវ័យ ៧៥ឆ្នាំរូបនេះ ត្រូវបានកាត់ទោសឲ្យជាប់ពន្ធនាគាររយៈពេល ៨ឆ្នាំពីបទប្រព្រឹត្តអំពើពុករលួយ និងរំលោភបំពានអំណាច បន្ទាប់ពីរូបលោក បានវិលត្រលប់មកកាន់ប្រទេសថៃវិញ កាលពី ២ឆ្នាំមុន ក្រោយនិរទេសខ្លួនទៅក្រៅប្រទេសអស់រយៈពេល ១៥ឆ្នាំ។ ក្រោយមក លោក ថាក់ស៊ីន ត្រូវបានព្រះមហាក្សត្រលើកលែងទោសវិញ នៅរយៈពេល ៦ខែក្រោយការធ្វើមាតុភូមិនិវត្តន៍។
កាលពីឆ្នាំមុន លោក ថាក់ស៊ីន ត្រូវបានចោទប្រកាន់ពីបទប្រមាថព្រះមហាក្សត្រជុំវិញការអធិប្បាយរបស់លោក នៅក្នុងបទសម្ភាសជាមួយប្រព័ន្ធផ្សព្វផ្សាយកូរ៉េខាងត្បូង កាលពីជាង ៩ឆ្នាំមុន ហើយលោកនឹងត្រូវប្រឈមមុខនឹងការកាត់ទោស នៅខែកក្កដាខាងមុខនេះផងដែរ។
ប៉ុន្តែទោះជាយ៉ាងណាក៏ដោយ កាលពីចុងសប្តាហ៍មុន តុលាការថៃ បានសម្រេចអនុញ្ញាតអតីតនាយករដ្ឋមន្ត្រីរូបនេះ ធ្វើដំណើរទៅក្រៅប្រទេសជាលើកដំបូង ដោយលើកឡើងពីអត្ថប្រយោជន៍នៃទំនាក់ទំនងអន្តរជាតិ ជាហេតុផលសម្រាប់ការចាកចេញពីប្រទេសជាបណ្តោះអាសន្ន បើទោះបីជាមិនមានការបញ្ជាក់លម្អិតអំពីគោលបំណងនៃការធ្វើដំណើរនេះក៏ដោយ។
ទន្ទឹមនឹងនេះ សេចក្តីថ្លែងការណ៍របស់តុលាការថៃ បានគូសបញ្ជាក់ថា៖ “តុលាការបានពិចារណា និងអនុញ្ញាតឲ្យជនជាប់ចោទចាកចេញពីប្រទេសថៃ នៅចន្លោះថ្ងៃទី២-៣ ខែកក្កដា ដែលនឹងមិនប៉ះពាល់ដល់ការកាត់ក្តីនោះឡើយ”។
មិនតែប៉ុណ្ណោះ នៅក្រោមការអនុញ្ញាតពីតុលាការនេះ លោក ថាក់ ស៊ីន ចាំបាច់ត្រូវរាយការណ៍ទៅអាជ្ញាធរក្នុងរយៈពេលបីថ្ងៃក្រោយការវិលត្រលប់របស់លោក ចូលមកកាន់ប្រទេសវិញ។
ជម្រាបជូនផងដែរថា កាលពីខែធ្នូ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានតែងតាំងលោក ថាក់ស៊ីន ជាទីប្រឹក្សាផ្ទាល់ខ្លួនរបស់លោក សម្រាប់កិច្ចប្រជុំកំពូលអាស៊ាននៅឆ្នាំនេះ ដែលម៉ាឡេស៊ី នឹងត្រូវធ្វើជាម្ចាស់ផ្ទះផ្ទាល់៕
