តារាសម្ដែង និងជាតារាចម្រៀងលំដាប់កំពូលរបស់តៃវ៉ាន់ អ្នកនាង Barbie Hsu ឬត្រូវបានគេស្គាល់ថាជាតួអង្គ សាន់ឆាយ បានទទួលមរណភាពក្នុងអាយុ ៤៩ឆ្នាំ ដោយបន្សល់ទុកនូវទ្រព្យសម្បត្តិដ៏ច្រើនសន្ធឹកសន្ធាប់ដែលបានកសាងឡើង ក្នុងអាជីពដ៏យូរអង្វែងរបស់នាង។
យោងតាមការចុះផ្សាយពីសារព័ត៌មាន Sao Star ដោយដកស្រង់ពីទិន្នន័យពី ETToday បានបង្ហាញឲ្យដឹងថាអ្នកនាង Hsu ទទួលបានកិច្ចព្រមព្រៀងធំៗជាច្រើនស្ទើតែពេញមួយអាជីពរបស់របស់ខ្លួន ដែលមានទំហំទឹកប្រាក់ដល់ទៅ ៤,៧៥លានដុល្លារអាមេរិកឯណោះ។
ក្រៅតែពីអាជីពជាតារាសម្តែង អ្នកនាង Hsu ក៏បានវិនិយោគយ៉ាងច្រើនលើអចលនវត្ថុផងដែរ ដោយមានអចលនទ្រព្យប្រណីតៗចំនួន ៣។ នាងបានទិញវីឡាចំនួនពីរដែលមានតម្លៃសរុបចំនួន ១៨លានដុល្លារ ហើយនៅឆ្នាំ២០១៦ នាងបានទិញផ្ទះល្វែងទំហំ ៧៦០ ម៉ែត្រការ៉េបន្ថែមទៀត ដែលស្ថិតនៅស្រុក Xinyi ទីក្រុងតៃប៉ិ ជាមួយអតីតស្វាមីជាអ្នកជំនួញជនជាតិចិន គឺលោក Wang Xiaofei ក្នុងតម្លៃ ១២លានដុល្លារ។
ប៉ុន្តែទោះជាយ៉ាងណាក៏ដោយ បន្ទាប់ពីការលែងលះជាមួយលោក Wang នៅក្នុងឆ្នាំ២០២១ កាសែត Mirror Media បានប៉ាន់ប្រមាណថាអ្នកនាង Hsu ទទួលបានចំណែកចំនួន ៦០០លានដុល្លារតៃវ៉ាន់ (១៩លានដុល្លារ) ពីទ្រព្យសម្បត្តិសរុបរបស់ពួកគេដែលមានតម្លៃសរុបប្រមាណ ៩៥០លានដុល្លារតៃវ៉ាន់ (២៩លានដុល្លារអាមេរិក) ។ ហើយមិនយូរប៉ុន្មានបន្ទាប់ពីការបែកគ្នានេះ អ្នកនាង Hsu ក៏បានសម្រេចរៀបការជាមួយតន្ត្រីករជនជាតិកូរ៉េខាងត្បូង DJ Koo ជំនួសវិញ។
យោងតាមរបាយការណ៍ពី AsiaOne បង្ហាញថាអ្នកនាង Hsu មានជំងឺរលាកសួតធ្ងន់ធ្ងរ បន្ទាប់ពីកើតជំងឺគ្រុនផ្តាសាយ អំឡុងពេលវិស្សមកាលជុំគ្រួសារក្នុងប្រទេសជប៉ុន ក្នុងឱកាសបុណ្យចូលឆ្នាំថ្មី។ ក្រុមគ្រួសាររបស់អ្នកនាងបានសម្ដែងការសោកស្ដាយយ៉ាងខ្លាំងចំពោះមរណភាពដែលនឹកស្មានមិនដល់នេះ។
ជម្រាបជូនផងដែរថា អ្នកនាង Hsu ដែលត្រូវបានអ្នកនិយមតាមដានរឿងភាគនៅក្នុងប្រទេសកម្ពុជាស្គាល់ តាមរយ:តួអង្គ សាន់ឆាយ នេះ ទទួលបានភាពល្បីល្បាញតាមរយៈតួនាទីរបស់នាងនៅក្នុងរឿងភាគទូរទស្សន៍ល្បីៗ ដូចជា “Meteor Garden”, “Mars” និង “Summer’s Desire” ជាដើម៕
