អ្នកនាំពាក្យរបស់សេតវិមានបានបង្ហាញឲ្យដឹងថា ប្រធានាធិបតីអាមេរិក លោក ដូណាល់ ត្រាំ នឹងមានកិច្ចពិភាក្សាជាមួយប្រធានាធិបតីចិន លោក ស៊ី ជិនពីង ឆាប់ៗក្នុងសប្តាហ៍នេះ ខណៈប្រទេសដែលមានសេដ្ឋកិច្ចធំជាងគេទាំងពីររបស់ពិភពលោក កំពុងស្វែងរកកិច្ចព្រមព្រៀងមួយដែលអាចទប់ស្កាត់ការកើតមានសង្គ្រាមពាណិជ្ជកម្មកាន់តែទូលំទូលាយ។ នេះបើតាមការចុះផ្សាយពីសារព័ត៌មាន Reuters។
ប្រធានាធិបតី លោក ដូណាល់ ត្រាំ កាលពីថ្ងៃសៅរ៍បានបញ្ជាឲ្យដាក់ពន្ធលើទំនិញពីប្រទេសម៉ិកស៊ិក កាណាដា និងចិន ដែលជាផ្នែកមួយនៃការទាមទាររបស់ខ្លួន ជុំវិញការទប់ស្កាត់លំហូរនៃសារធាតុញៀន fentanyl ខុសច្បាប់ និងបញ្ហាបទឧក្រិដ្ឋកម្មតាមព្រំដែន។
រម្លឹកផងដែរថា លោក ត្រាំ បានសម្រេចផ្អាកការយកពន្ធគយដ៏ច្រើនលើប្រទេសម៉ិកស៊ិក និងកាណាដាវិញ កាលពីថ្ងៃចន្ទ ប៉ុន្តែការយកពន្ធរបស់សហរដ្ឋអាមេរិក លើប្រទេសចិន នៅតែត្រូវចូលជាធរមាន ក្នុងរយៈពេលប៉ុន្មានម៉ោងក្រោយមក។
ប៉ុន្តែទោះជាយ៉ាងណាក៏ដោយ អ្នកនាំពាក្យសេតវិមាន លោកស្រី Karoline Leavitt បានបញ្ជាក់ឲ្យដឹងថា ការពិភាក្សាតាមទូរស័ព្ទរវាងមេដឹកនាំសហរដ្ឋអាមេរិក និងចិន អាចនឹងកើតមានឡើងក្នុងរយៈពេលពីរបីថ្ងៃខាងមុខ។
គួរឲ្យដឹងថា កាលពីថ្ងៃចន្ទដើមសប្តាហ៍នេះ ប្រធានាធិបតី លោក ត្រាំ បានគំរាមចាត់វិធានការយ៉ាងតឹងរ៉ឹងទៅលើផែនការពន្ធគយរបស់ខ្លួនលើប្រទេសចិន ដោយបានដាក់ពន្ធ ១០% បន្ថែមលើទំនិញទាំងអស់របស់ពួកគេនៅថ្ងៃសៅរ៍ ហើយត្រូវបានកំណត់ឲ្យចូលជាធរមាន នៅព្រឹកថ្ងៃអង្គារ ទី៤ ខែកុម្ភ:កន្លងទៅ។
ទន្ទឹមនឹងនេះ សហរដ្ឋអាមេរិកបាននិយាយទៀតថា ប្រទេសចិនគឺជាប្រភពចម្បងនៃចែកចាយសារធាតុគីមី ក្នុងការផលិតជាគ្រឿងញៀន fentanyl ដោយក្រុមជួញដូរគ្រឿងញៀននៅក្នុងប្រទេសម៉ិកស៊ិក។ ប៉ុន្តែទោះជាយ៉ាងណាក៏ដោយ រដ្ឋាភិបាលទីក្រុងប៉េកាំងបាននិយាយថា ខ្លួនបានចាត់វិធានការសំខាន់ៗរួចមកហើយ ដើម្បីបង្ក្រាបសារធាតុគីមី និងវិធានការណ៍ផ្សេង ដើម្បីកាត់បន្ថយការជួញដូរគ្រឿងញៀនខុសច្បាប់៕
