ប្រធានាធិបតីម៉ិកស៊ិក លោកស្រី ក្លាឌីអា សៀនបាម (Claudia Sheinbaum) កាលពីថ្ងៃព្រហស្បតិ៍ ទី១៣ ខែកុម្ភ:កន្លងទៅ បានជំរុញឲ្យក្រុមហ៊ុន Google ពិចារណាឡើងវិញនូវការសម្រេចចិត្តរបស់ខ្លួន ក្នុងការប្តូរឈ្មោះឈូងសមុទ្រម៉ិកស៊ិក ទៅជា “ឈូងសមុទ្រអាមេរិក” សម្រាប់អ្នកប្រើប្រាស់នៅក្នុងទឹកដីសហរដ្ឋអាមេរិក ដោយបន្ថែមថារដ្ឋភិបាលរបស់ខ្លួនអាចនឹងប្តឹងរដ្ឋប្បវេណីប្រឆាំងនឹងក្រុមហ៊ុននេះ ប្រសិនបើចាំបាច់។ នេះបើតាមការចុះផ្សាយពីសារព័ត៌មាន CNA។
គួរឲ្យដឹងថា ក្រុមហ៊ុន Google បានប្តូរឈ្មោះសម្រាប់អ្នកប្រើប្រាស់ Google Maps របស់សហរដ្ឋអាមេរិក ដើម្បីឆ្លុះបញ្ចាំងពីការសម្រេចចិត្តរបស់រដ្ឋាភិបាលប្រធានាធិបតីអាមេរិក លោក ដូណាល់ ត្រាំ ក្នុងការប្តូរឈ្មោះឈូងសមុទ្រម៉ិកស៊ិក ទៅជា ឈូងសមុទ្រអាមេរិក វិញ។
លោកស្រី Sheinbaum បានបដិសេធម្តងហើយម្តងទៀតអំពីការផ្លាស់ប្តូរនេះ ដោយលើកហេតុផលថា ឈ្មោះ “ឈូងសមុទ្រម៉ិកស៊ិក” ត្រូវបានគេទទួលស្គាល់ជាអន្តរជាតិជាយូរមកហើយ។ កាលពីថ្ងៃព្រហស្បតិ៍ មេដឹកនាំរូបនេះ ក៏បាននិយាយទៀតផងដែរថា Google មិនបានដោះស្រាយពា្យបណ្តឹងមុនៗរបស់ម៉ិកស៊ិកនៅឡើយទេ។
ទន្ទឹមនឹងនេះ លោកស្រី Sheinbaum សង្កត់ធ្ងន់ថា ប្រសិនបើកក្រុមហ៊ុន Google នៅតែប្រកាន់យកការផ្លាស់ប្តូរឈ្មោះនេះ ម៉ិកស៊ិកអាចប្តឹងទៅកាន់តុលាការ។ លោកស្រីបានបន្ថែមថា៖ “បើចាំបាច់ យើងនឹងដាក់ពាក្យបណ្តឹងរដ្ឋប្បវេណី។ ផ្នែកច្បាប់របស់យើងកំពុងពិនិត្យមើលថា តើយើងអាចនឹងចាត់វិធានការអ្វីបានខ្លះ ប៉ុន្តែយើងសង្ឃឹមថា Google នឹងពិចារណាឡើងវិញ”។
ជម្រាបជូនផងដែរថា សម្រាប់អ្នកប្រើប្រាស់កម្មវិធី Google Maps នៅម៉ិកស៊ិក នៅតែអាចមើលឃើញឈ្មោះ “ឈូងសមុទ្រម៉ិកស៊ិក”។ ប៉ុន្តែសម្រាប់អ្នកប្រើប្រាស់ Google Maps នៅខាងក្រៅប្រទេសទាំងពីរ អាចនឹងមើលឃើញឈូងសមុទ្រនេះមានឈ្មោះពីរ ពោលគឺ ឈូងសមុទ្រម៉ិកស៊ិកផង និងឈូងសមុទ្រអាមេរិកផង៕
