ប្រធានក្រុមហ៊ុន Alibaba លោក Joe Tsai បាននិយាយកាលពីថ្ងៃព្រហស្បតិ៍ ទី១៣ ខែកុម្ភៈកន្លងទៅ ថាក្រុមហ៊ុនរបស់លោកនឹងចាប់ដៃគូជាមួយ Apple ដើម្បីបំពាក់បញ្ញាសិប្បនិម្មិត (AI) សម្រាប់ទូរស័ព្ទ iPhones ដែលលក់ក្នុងទីផ្សារប្រទេសចិន។ នេះបើតាមការចុះផ្សាយពីសារព័ត៌មាន CNA។
ជុំវិញការសហការនេះ ត្រូវបានប្រកាសឡើង អំឡុងពេលលោក Tsai ចូលរួមកិច្ចប្រជុំកំពូលរដ្ឋាភិបាលពិភពលោក នៅទីក្រុងឌូបៃ ដោយនិយាយថា ៖”Apple បានពិភាក្សាជាមួយក្រុមហ៊ុនមួយចំនួននៅក្នុងប្រទេសចិន។ ប៉ុន្តែនៅទីបំផុតពួកគេបានជ្រើសរើសធ្វើអាជីវកម្មជាមួយយើង។ ពួកគេចង់ប្រើ AI របស់យើងដើម្បីផ្តល់ថាមពលដល់ទូរស័ព្ទរបស់ពួកគេ”។
ក្រោយការប្រកាសនេះ ភាគហ៊ុនដែលបានចុះបញ្ជីនៅទីផ្សាហ៊ុនហុងកុងរបស់ Alibaba បានកើនឡើង ៩,២% ដល់តម្លៃ ១២៤,៣ដុល្លារហុងកុង ដែលជាតម្លៃខ្ពស់បំផុតមិនធ្លាប់មានរបស់ពួកគេ គិតចាប់តាំងពីខែមករា ឆ្នាំ២០២២ មក។
គួរឲ្យដឹងផងដែរេថា ការធ្វើសមាហរណកម្ម AI បានឈានដល់ពេលដ៏សំខាន់បំផុតមួយសម្រាប់ក្រុមហ៊ុន Apple ដែលបានប្រឈមមុខនឹងការធ្លាក់ចុះនៃការលក់ទូរស័ព្ទ iPhone របស់ពួកគេ នៅក្នុងប្រទេសចិន ចំពេលមានការប្រកួតប្រជែងកាន់តែខ្លាំងឡើងពីសំនាក់គូប្រជែងក្នុងស្រុក ជាពិសេសក្រុមហ៊ុន Huawei ។
ក្រុមហ៊ុន Apple បានទទួលរងនូវការធ្លាក់ចុះគួរឲ្យកត់សម្គាល់នៅក្នុងប្រទេសចិន ក្នុងឆ្នាំ២០២៤ កន្លងទៅ ដោយបានបាត់បង់មកុដរបស់ខ្លួន ក្នុងនាមជាអ្នកលក់ស្មាតហ្វូនដាច់បំផុតរបស់ប្រទេសនេះ។
យោងតាមក្រុមហ៊ុនស្រាវជ្រាវទីផ្សារ Canalys បានបង្ហាញឲ្យដឹងថា ការនាំចេញប្រចាំឆ្នាំរបស់ក្រុមហ៊ុន Apple នៅក្នុងប្រទេសចិន បានធ្លាក់ចុះ ១៧% ដែលអនុញ្ញាតឲ្យក្រុមហ៊ុនផលិតស្មាតហ្វូនក្នុងស្រុកនាំមុខ។
ទន្ទឹមនឹងនេះ ក្រុមហ៊ុន Vivo បានដណ្តើមបានចំណែកទីផ្សារធំជាងគេ រហូតដល់ទៅ ១៧% ខណៈ Huawei ទទួលបានចំណាត់ថ្នាក់លេខ២ ដោយមានចំណែកទីផ្សារសរុប ១៦% និងតាមពីក្រោយដោយក្រុមហ៊ុន Apple ជាមួយចំណែកទីផ្សារ ១៥%៕
