ក្នុងខែមករា ចំនួនរថយន្តដែលវៀតណាម នាំចូលពីប្រទេសចិន បានកើនឡើងដល់ចំនួសរុប ២ ៥៩៥ គ្រឿង ពោលគឺបានវ៉ាដាច់ប្រទេសថៃ ដែលបាននាំចូលរថយន្តចំនួន ១ ៦៣១ គ្រឿង។ នេះបើតាមការចុះផ្សាយពីសារព័ត៌មាន VN Express។
យោងតាមស្ថិតិរបស់អគ្គនាយកដ្ឋានគយវៀតណាម បានបង្ហាញឲ្យដឹងថា ចំនួនរថយន្តដែលបាននាំចូលទៅប្រទេសវៀតណាម ក្នុងខែដំបូងនៃឆ្នាំ២០២៥ នេះ បានកើនឡើងដល់ចំនួនសរុប ៧ ២២៦ គ្រឿង ពោលគឺកើនឡើងជាង ៧% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះចំនួនរថយន្តដែលនាំចូលមកពីប្រទេសចិន មានជាង២ ៥០០គ្រឿង ឈរនៅចំណាត់ថ្នាក់លេខ២ បន្ទាប់ពីប្រទេសឥណ្ឌូណេស៊ី ដែលមានចំនួនសរុប ២ ៦២១ គ្រឿង។
ប៉ុន្តែទោះជាយ៉ាងណាក៏ដោយ ប្រសិនបើគិតតែលើរថយន្តដឹកអ្នកដំណើរ ចំនួនរថយន្តដែលនាំចូលពីប្រទេសចិន នៅតែទាបជាងទីផ្សារអាស៊ីអាគ្នេយ៍ទាំងពីរ។
រម្លឹកផងដែរថា ចំនួនរថយន្តដែលនាំចូលច្រើនជាងគេទៅកាន់ប្រទេសវៀតណាម កាលពីធ្នូ ត្រូវបាននាំមុខគេ ដោយប្រទេសឥណ្ឌូណេស៊ីមានរថយន្តសរុបចំនួន ២ ៦២១ គ្រឿង ថៃមាន ១ ៥២២ គ្រឿង និងប្រទេសចិនមាន ១ ២១៦ គ្រឿង។
ជម្រាបជូនផងដែរថា ជុំវិញការកើនឡើងនៃចំនួនរថយន្តដែលនាំចូលពីប្រទេសចិន វៀតណាម បានកើតឡើងដោយសារតែការកើនឡើងនៃចំនួនម៉ាកយីហោចិន។ នៅឆ្នាំ២០២៤ ម៉ាករថយន្តចិនសរុបចំនួន៧ បានចូលក្នុងទីផ្សារប្រទេសវៀតណាម ដោយក្នុងនោះរួមមាន BYD, Omoda, Jaecoo, GAC, Aion, Geely និង Zeekr ស្របពេលនៅដើមឆ្នាំនេះ ម៉ាកយីហោរបស់ចិនមួយផ្សេងទៀត គឺ Dongfeng ក៏បានហក់ចូលក្នុងទីផ្សាររបស់ប្រទេសនេះ ផងដែរ៕
