ក្រុមហ៊ុនអាវកាស Blue Origin របស់មហាសេដ្ឋីលំដាប់កំពូលរបស់ពិភពលោក Jeff Bezos កាលពីពេលថ្មីៗនេះ កំពុងបញ្ឈប់បុគ្គលិករបស់ខ្លួនប្រហែល ១០% ពោលគឺស្មើទៅនឹងចំនួនប្រមាណ ១ ០០០ នាក់។ នេះបើតាមការចុះផ្សាយពីសារព័ត៌មានធំៗជាច្រើន។
យោងតាមប្រភពពីសារព័ត៌មាន CNN និង The New York Times បានបង្ហាញឲ្យដឹងថា នាយកប្រតិបត្តិក្រុមហ៊ុន Blue Origin លោក Dave Limp បានប្រកាសពីការកាត់បន្ថយនេះ តាមរយ:ការផ្ញើអ៊ីមែលទៅកាន់បុគ្គលិកដែលត្រូវបញ្ឈប់ចេញពីការងារ ដោយផ្ទាល់។
គួរឲ្យដឹងផងដែរថា ជុំវិញការកាត់បន្ថយនេះ នឹងប៉ះពាល់ដល់បុគ្គលិកផ្នែកវិស្វកម្ម ការស្រាវជ្រាវ និងការអភិវឌ្ឍន៍ ការគ្រប់គ្រងគម្រោង និងអ្នកគ្រប់គ្រងទូទៅ ផងដែរ។
Blue Origin បច្ចុប្បន្នត្រូវបានគេរាយការណ៍ថាមានបុគ្គលិកសរុបប្រហែល ១០ ០០០ នាក់ ដូច្នេះការបញ្ឈប់ការងារចុងក្រោយនេះ អាចនឹងត្រូវកាត់បន្ថយចំនួនបុគ្គលិកសរុបរបស់ខ្លួនដល់ទៅ ១០% ។នេះបើតាមការចុះផ្សាយពីសារព័ត៌មាន The New York Times។
ទន្ទឹមនឹងនេះ លោក Dave Limp បាននិយាយថា ៖”ក្រុមហ៊ុនរបស់យើង ទទួលបានភាពរីកចម្រើន និងជួលបុគ្គលិកថ្មីៗជាច្រើនមិនគួរឲ្យជឿក្នុងរយៈពេលប៉ុន្មានឆ្នាំចុងក្រោយនេះ ហើយជាមួយនឹងការរីកចម្រើននោះ បាននាំមកនូវកន្លែងទំនេរៗនៅក្នុងការិយាល័យកាន់តែច្រើន ដូច្នេះវាបានធ្វើឲ្យមានការផ្តោតអារម្មណ៍តិចជាងអ្វីដែលយើងត្រូវការ”។ លោក Dave បានសង្កត់ធ្ងន់ទៀតថា ក្រុមហ៊ុនមានភាពចាំបាច់ដើម្បីរៀបចំតួនាទីរបស់បុគ្គលិកឡើងវិញ ដើម្បីអនុវត្តអាទិភាពរបស់ខ្លួនប្រកបដោយប្រសិទ្ធភាព។
ជម្រាបជូនថា លោក Jeff Bezos បានបង្កើតក្រុមហ៊ុន Blue Origin ឡើងក្នុងឆ្នាំ២០០០ ពោលមុនពេលមហាសេដ្ឋី Elon Musk បានបង្កើតក្រុមហ៊ុន SpaceX នៅពីរឆ្នាំក្រោយ។ មហាសេដ្ឋីកំពូលរបស់ពិភពលោកទាំងពីរ បាននិយាយថា ពួកគេសុទ្ធសឹងតែមានគោលបំណងធំដូចគ្នា ពោលគឺចង់ជួយមនុស្សជាតិយល់ដឹងកាន់តែច្បាស់បន្ថែមទៀត នៅក្នុងទីលំហអាកាស៕
