ប្រធានាធិបតីអាមេរិក លោក ដូណាល់ ត្រាំ បានហៅមេដឹកនាំអ៊ុយក្រែន លោក Volodymyr Zelenskyy ថាជា “ជនផ្តាច់ការ” កាលពីថ្ងៃពុធ ទី១៩ ខែកុម្ភ: ដោយថែមទាំងបានព្រមានទៀតថា លោក Zelenskyy គួរតែចូលតុចរចាស្វែងរកសន្តិភាពឲ្យបានលឿន បើមិនចង់បាត់បង់ប្រទេសខ្លួនទាំងមូលទេនោះ។ នេះបើតាមការចុះផ្សាយពីសារព័ត៌មាន AFP។
ប្រធានាធិបតីអាមេរិក លោក ដូណាល់ ត្រាំ បានបង្ហោះនៅលើបណ្តាញសង្គម Truth Social ថា ៖”គ្រាន់តែគិតទៅ តារាកំប្លែងដែលបរាជ័យរូបនេះ បានបញ្ចុះបញ្ចូលសហរដ្ឋអាមេរិក ឲ្យផ្តល់ជំនួយប្រមាណ ៣៥០ពាន់លានដុល្លារដល់គាត់ ដើម្បីចូលទៅក្នុងសង្រ្គាមដែលមិនមានសង្ឃឹមថាអាចឈ្នះបាន និងជាសង្គ្រាមដែលមិនគួរតែកើតឡើងទាល់តែសោះ” ។
លោកត្រាំ បានសរសេរបន្ថែមទៀតថា ៖ “មេដឹកនាំផ្តាច់ការដែលមិនបានជាប់ឆ្នោត Zelenskyy គួរតែជ្រើសរើសចូលតុចរចាដើម្បីស្វែងរកសន្តិភាពឲ្យបានលឿន បើមិនដូច្នេះទេគាត់នឹងមិនមានប្រទេសរស់នៅទៀតទេ។ Zelenskyy បានព្យាយាមបដិសេធមិនរៀបចំការបោះឆ្នោត នៅអ៊ុយក្រែន ហើយរឿងតែមួយគត់ដែលគាត់ពូកែគឺការអែបអបអតីតប្រធានាធិបតីលោក បៃដិនប៉ុណ្ណោះ”។
គួរឲ្យដឹងផងដែរថា ជុំវិញការការបង្ហោះបែបនេះ ត្រូវបានធ្វើឡើងត្រឹមតែមួយថ្ងៃប៉ុណ្ណោះ បន្ទាប់ពីលោក ត្រាំ បានរិះគន់អ៊ុយក្រែន ជុំវិញការដកខ្លួនចេញរបស់លោក Zelenskyy ពីការពិភាក្សាអំពីការបញ្ចប់សង្គ្រាមនៅប្រទេសអារ៉ាប៊ីសាអូឌីត។
សង្រ្គាមពាក្យសម្ដីរវាងលោក ត្រាំ និងលោក Zelenskyy បានកើតឡើងបន្ទាប់ពីលោកប្រធានាធិបតីអាមេរិក បានអះអាងថាអ៊ុយក្រែនជាអ្នកបង្កឲ្យមានការឈ្លានពានរបស់រុស្ស៉ី កាលពីឆ្នាំ២០២២ ហើយជាការឆ្លើយតបវិញ លោក Zelenskyy បាននិយាយថាលោក ត្រាំ កំពុងរស់នៅក្នុងពិភពនៃព័ត៌មានក្លែងក្លាយ។
ជម្រាបជូនថា អាណត្តិជាប្រធានាធិបតី ៥ឆ្នាំរបស់លោក Zelenskyy ត្រូវបានសន្មត់ថាបានផុតកំណត់រួចទៅហើយ តាំងពីឆ្នាំ២០២៤ មកម្លេះ ប៉ុន្តែការបោះឆ្នោតប្រធានាធិបតី និងសភា មិនអាចត្រូវបានធ្វើឡើងនោះឡើយ ក្នុងពេលដែលអ៊ុយក្រែនកំពុងប្រើប្រាស់ច្បាប់អាជ្ញាសឹក ដែលលោក Zelenskyy ប្រកាសដាក់ឲ្យប្រើក្នុងខែកុម្ភៈ ឆ្នាំ២០២២ ជាការឆ្លើយតបទៅនឹងការឈ្លានពានពីសំណាក់ប្រទេស រុស្ស៉ី៕
