កូរ៉េខាងត្បូង កាលពីពេលថ្មីៗនេះ បានសម្រេចដាក់ពន្ធជាបណ្តោះអាសន្នរហូតដល់ទៅ ៣៨% លើការនាំចូលដែកបន្ទះរបស់ប្រទេសចិន បន្ទាប់ពីមានការស៊ើបអង្កេតមួយត្រូវបានធ្វើឡើង ជុំវិញការលក់បង្ខូចតម្លៃទៅលើផលិតផលដែកដែលប្រើប្រាស់នៅក្នុងកាសាងសង់កប៉ាល់ និងសំណង់។ នេះបើតាមការចុះផ្សាយពីសារព័ត៌មាន Reuters។
ជុំវិញផែនការពន្ធគយថ្មីដែលត្រូវបានប្រកាសដោយក្រសួងឧស្សាហកម្មកូរ៉េខាងត្បូង កាលពីថ្ងៃព្រហស្បតិ៍ ត្រូវបានធ្វើឡើងបន្ទាប់ពីអាជ្ញាធរកូរ៉េ បានផ្តួចផ្តើមការស៊ើបអង្កេតលើការលក់បង្ខូចតម្លៃដោយក្រុមហ៊ុនផ្គត់ផ្គង់ដែកថែបរបស់ចិន បន្ទាប់ពីក្រុមហ៊ុនក្នុងស្រុកបានប្តឹងអំពីការហូរចូលដ៏ច្រើនលើសលប់ពេកនៃផលិតផលដែកបន្ទះដែលមានតម្លៃទាបពីប្រទេសចិន។
ទន្ទឹមនឹងនេះ ក្រសួងបាននិយាយនៅក្នុងសេចក្តីថ្លែងការណ៍មួយថា ៖”ដើម្បីការពារការខូចខាតដែលអាចកើតឡើងក្នុងអំឡុងពេលស៊ើបអង្កេតពេញលេញ យើងបានសម្រេចចិត្តផ្តល់អនុសាសន៍ឲ្យដាក់កាតព្វកិច្ចពន្ធប្រឆាំងការលក់បង្ខូចតម្លៃជាបណ្តោះអាសន្ន ចន្លោះពី ២៧,៩% ទៅ ៣៨% ទៅលើផលិតផលដែករបស់ចិន ទៅកាន់រដ្ឋមន្ត្រីហិរញ្ញវត្ថុ”។
គួរឲ្យដឹងផងដែរថា នៅក្នុងឆ្នាំ២០២៤ កូរ៉េខាងត្បូងបាននាំចូលផលិតផលដែកមានតម្លៃ ១០,៤ពាន់លានដុល្លារពីប្រទេសចិន ឬស្មើនឹង ៤៩% នៃការនាំចូលដែកថែបសរុបរបស់ខ្លួន។
យ៉ាងណាមិញ ក្រោយការប្រកាសពីវិធានការពន្ធថ្មីនេះ បានធ្វើឲ្យភាគហ៊ុនរបស់ក្រុមហ៊ុនផលិតដែកក្នុងស្រុក Hyundai Steel កើនឡើង ៥,៨% ស្របពេលក្រុមហ៊ុន Posco Holdings ក៏បានកើនឡើង ៣,៩% ផងដែរ នៅក្នុងការជួញដូរចុងក្រោយ កាលពីថ្ងៃព្រហស្បតិ៍។
ជម្រាបជូនផងដែរថា ការត្រួតពិនិត្យលើការនាំចូលដែកថែបក៏កើតមានឡើងផងដែរ ខណៈពេលដែលកូរ៉េខាងត្បូងកំពុងទប់ទល់នឹងផលប៉ះពាល់លើឧស្សាហកម្មក្នុងស្រុក ក្រោយការដាក់ចេញវិធានការពន្ធគយ ២៥% លើការនាំចូលដែកថែប និងអាលុយមីញ៉ូម របស់ប្រធានាធិបតីអាមេរិក លោក ដូណាល់ ត្រាំ៕