ប្រធានាធិបតីអាមេរិក លោក ដូណាល់ ត្រាំ កាលពីពេលថ្មីៗនេះ បាននិយាយថា សហភាពអឺរ៉ុប (EU) ត្រូវបានបង្កើតឡើងដើម្បីតែកេងចំណេញ និងទាញយកប្រយោជន៍ពីសហរដ្ឋអាមេរិកប៉ុណ្ណោះ ហើយថែមទាំងបានព្រមានទៀតថា លោកអាចនឹងដាក់ពន្ធ ២៥% ទៅលើទំនិញនាំចូលពីអឺរ៉ុប ក្នុងពេលឆាប់ៗខាងមុខនេះ។ នេះបើតាមការចុះផ្សាយពីសារព័ត៌មាន AFP។
ជុំវិញការលើកឡើងបែបនេះ ត្រូវបានកើតឡើងបន្ទាប់ពីលោក ត្រាំ ធ្លាប់បានទទូចម្តងហើយម្តងទៀតថា EU ពិតជាបានទាញយកប្រយោជន៍យ៉ាងច្រើនពីអាមេរិក ជាពិសេសទៅលើការកេងផលចំណេញពីការធ្វើពាណិជ្ជកម្ម។ យោងតាមតួលេខផ្លូវការមួយ បានបង្ហាញឲ្យដឹងថា សហរដ្ឋអាមេរិក មានឱនភាពពាណិជ្ជកម្មក្នុងចំនួនដល់ទៅ ២៣៥,៦ពាន់លានដុល្លារ ជាមួយប្លុកអឺរ៉ុបដែលមាន ២៧ ប្រទេស កាលពីឆ្នាំមុន។
យ៉ាងណាមិញ នៅពេលត្រូវបានគេសួរថាតើលោកនឹងធ្វើការសម្រេចចិត្តលើផែនការពន្ធគយរបស់ EU យ៉ាងណា? ខណ:ភ្លាមនោះ លោក ត្រាំ បានឆ្លើយតបវិញថា ៖”យើងនឹងប្រកាសវាក្នុងពេលឆាប់ៗខាងមុខ ហើយជាទូទៅពន្ធគយថ្មីនេះនឹងមានកម្រិត ២៥%”។ លោកបានបន្តទៀតថា រថយន្តនឹងស្ថិតក្នុងចំណោមផលិតផលរបស់អឺរ៉ុបផ្សេងទៀត ដែលអាមេរិកនឹងដាក់ពន្ធ។
មិនតែប៉ុណ្ណោះ ដោយបានប្រតិកម្មចំពោះបញ្ហានេះ សហភាពអឺរ៉ុបប្រកាសថាខ្លួននឹងចាត់វិធានការវាយបកវិញយ៉ាងម៉ឺងម៉ាត់ និងជាបន្ទាន់ប្រឆាំងនឹងអ្វីដែលស្ថាប័ននេះចាត់ទុកថាជាការដំឡើងពន្ធមិនសមហេតុផល។
ជម្រាបជូនផងដែរថា សហភាពអឺរ៉ុបគឺជាដៃគូពាណិជ្ជកម្មធំជាងគេបំផុតទីបីរបស់សហរដ្ឋអាមេរិក។ យោងតាមរបាយការណ៍ចុះផ្សាយដោយសារព័ត៌មាន Bloomberg បានបង្ហាញឲ្យដឹងថា វិធានការពន្ធគយថ្មីដែលស្នើឡើងដោយលោក ត្រាំ នេះ អាចប៉ះពាល់ដល់ប្រមាណជិត ៣០ពាន់លានដុល្លារ នៃការនាំចេញទំនិញរបស់ EU ៕
